Skip navigation.
Home

Felice Natal e bon anno nove 2014

Un salute del Consilio Executive del Union Mundial pro Interlingua in occasion del fin de 2013:

  Le fin de 2013 se approxima. Illo ha essite un anno plen de activitates pro interlingua in tote le mundo con multe bon resultatos in le labor pro diffunder le cognoscentia a interlingua e trovar sempre plus de personas, qui vole usar lo activemente.

Le Union Mundial pro Interlingua (UMI) labora sur cinque continentes, e il assi es impossibile esser sempre si visibile, como on desira. Felicemente, il ha multe bon supportatores local, e nos ha un rete de representantes national, qui dedica tempore e labora pro interlingua, pro assecurar un nivello apte de activitates, pro functionar como personas que nove interessatos pote contactar e - brevemente - pro facer interlingua plus visibile, assi que plus de personas apprende su existentia e comencia studiar e usar lo.

Le UMI e su consilio executive essaya esser le coordinator del activitates local, e nos essaya informar super le bon ideas, le eventos e le resultatos per medio de www.interlingua.com e le magazin international de novas, Panorama in interlingua, que es publicate omne duo menses. Ma nos non sape toto. Nos debe esser informate pro poter informar alteres. Isto es le responsabilitate del representantes de interlingua, ma nos invita omne membros a informar nos anque, si illes mesme prende initiativas que pote esser un inspiration pro alteres.

www.interlingua.com ha durante 2013 devenite multo plus grande. Un grande selection de materiales ha essite publicate, ma il pare que multe personas ancora non sape que il ha libros, audiolibros, e-libros, materiales pro le inseniamento, cursos, dictionarios, radio e multo plus disponibile - solmente un clic de te.

Usa pro isto le fin del anno pro orientar te super le multissime offertas a te:

  • www.interlingua.com > Libros e litteratura > Servicio de Libros UMI
    www.interlingua.com/libros/index.html
    un grande selection de titulos a comprar del libreria
     
  • www.interlingua.com > Libros e litteratura > Litteratura publicate per Lulu
    www.interlingua.com/lulu
    ancora un grande selection de titulos a comprar in linea
     
  • www.interlingua.com > Libros e litteratura > Grammatica de interlingua
    www.interlingua.com/grammatica
    tote le grammatica de interlingua
     
  • www.interlingua.com > Libros e litteratura > Inseniamento
    www.interlingua.com/instruction con multe materiales pro cursos in interlingua - anque como autostudio
     
  • www.interlingua.com > Libros e litteratura > Bibliotheca electronic
    www.interlingua.com/e-libros
    con multissime e-libros e audiolibros in interlingua, absolutemente gratuite - in formatos PDF, .epub e como audiolibros in MP3
     
  • www.interlingua.com > Libros e litteratura > Facile a leger in interlingua
    www.interlingua.com/facilealeger
    le nove serie de textos facile a leger in interlingua, con description de omne le libros e ligamines directe a comprar los. Anque materiales pro autores futur
     
  • www.interlingua.com > Angulo linguistic
    www.interlingua.com/linguistic
    plus que 175 consilios e responsas a questiones frequente de como usar interlingua correctemente e assi evitar errores obvie - con multe exemplos
  •  

Usa le multe ressources que nos continua poner a disposition - e narra a alteres ubi illes pote trovar los.

Le consilio executive del UMI desira regratiar omnes in tote le mundo, qui durante 2013 ha facite un labor pro interlingua - grande o minus grande. Il es tote iste initiativas que assecura que interlingua deveni plus cognoscite e plus usate per ancora multes.

Nos desira a omne membros, supportatores e interessatos e lor familias un multo felice Natal e un multo bon e successose anno nove 2014 con multe successo pro le diffusion de interlingua como le instrumento moderne de communication international. Nos spera poter contar con tu adjuta in 2014 pro promover e diffunder interlingua - communication sin frontieras.

Le Consilio Executive del UMI

(Lege super le Consilio Executive del UMI ci.)

Initio del pagina