Skip navigation.
Home

Première de "Facile a leger in interlingua"

Tres titulos aperi le nove serie con lectura facile in interlingua que sperabilemente pote facer plus de personas leger libros in le lingua.

Facile a leger in interlingua
"Facile a leger in interlingua" es un serie de publicationes pro illes qui ama interlingua ma desira apprender plus in un maniera interessante e amusante. Omne parolas que non es in le "Interlingua - dictionario basic" es explicate al pede de cata pagina.
UMI  Novellas policier, charmante classicos e nove originales aperi in commun le nove serie "Facile a leger in interlingua" que desde hodie pote esser comprate.

Le serie debe incoragiar plus de personas a leger libros in interlingua. Illo se basa sur le 2.500 parolas explicate in "Interlingua – dictionario basic" per Thomas Breinstrup e Italo Notarstefano, publicate in 2011, e omne parolas que non es explicate in le dictionario ma es usate in le textos essera explicate in interlingua in notas de pede.

Le serie ha essite sub preparation durante un longe tempore. Le première comprehende tres titulos: le narrationes charmante de Provence in Francia in "Litteras de mi molino" per Alphonse Daudet, novellas criminal e policier in "Le masca del morte rubie" e "Le homicidios in le Rue Morgue" per le autor american Edgar Allan Poe e un narration in photos "Le anno – 12 menses in photos e parolas" per Thomas Breinstrup super le cambio del anno. Un serie de nove titulos es sub preparation e va apparer durante le veniente menses.

Presentation del tres titulos

  • Litteras de mi molino (32 pp. A5, precio: 5 euros) es un collection de breve historias scribite per Alphonse Daudet (1840-1897) super le vita in su ancian molino in le sud de Francia. Iste libro contine quatro historias: “Le capra de Sr. Seguin”, “Le morte del Dauphin”, “Le curato de Cucugnan” e “Le secreto de maestro Cornille”.
     
  • Le homicidios in le Rue Morgue (44 pp. A5, precio: 6 euros) es un collection de quatro del Contos obscur per le autor Edgar Allan Poe (1809-1849): “Le homi­cidios in le Rue Morgue”, “Metzengerstein”, “Le barril de Amontillado” e “Le masca del Morte Rubie” - omnes es contos que va facer le capillos levar se. “Le homicidios in le Rue Morgue” es considerate le prime novella policier in le mundo.
     
  • Le natura face le 12 menses del anno multo differente. Cata mense ha un charme typic. Iste libro Le anno - 12 menses in photos e parolas (20 pp. A4 con spiral, precio: 10 euros) seque le cambios durante un anno – in photos e parolas. Lege le parolas que presenta le mense con observationes personal e factos, reguarda le multe belle photos, e gaude de vider, como le anno cambia mense post mense. Le libro in formato A4 es con un spiral practic pro facilitar le lectura.
     

Anque como e-libros
"Illos essera sequite per un serie de altere publicationes que es sub preparation. Omne le libros essera in colores, e on potera ordinar los directemente per le rete. Nos expecta lancear los anque como libros digital in le formato .epub, assi que on pote leger los sur le schermo," dice Thomas Breinstrup, qui es le redactor del serie.

Ille incoragia omnes, qui ha ideas a nove titulos in le serie, a adressar se a ille (e-posta: panorama@interlingua.com).

"Nos cerca textos original o traducite in un linguage fluente e attractive pro le lectores, qui debe esser inspirate a leger plus ... o a comenciar leger del toto," dice Thomas Breinstrup.

Con le adjuta del ex-presidente del Societate Svedese pro Interlingua, Ove Hanebring, ha essite developpate pro autores un corrector orthographic pro LibreOffice e OpenOffice con le 2.500 parolas in le dictionario basic. Le corrector indica omne parolas que non es in le dictionario, e que assi debe esser explicate, assi que il es facile trovar le parolas a explicar – o eventualmente rediger le texto pro facer lo plus facile al lectores.

Tote le explicationes del parolas va esser colligite in www.interlingua.com, assi que le autores pote reusar explicationes anterior e non sempre comenciar explicar del fundo. Iste material que es expectate crescer rapidemente, pote alora esser le fundo de un nove dictionario interlingua-interlingua plus comprehensive que "Interlingua – dictionario basic" que se limita a un vocabulario que coperi situationes quotidian.

Facile a leger in interlingua: Visita le pagina special del nove serie pro comprar le libros

Initio del pagina