Skip navigation.
Home

Talentos creative: Da nos un logo pro le conferentia

Freiburg
Visita le pagina official del 20esime Conferentia International de Interlingua

Le Union Mundial pro Interlingua invita mentes creative a designar le logo official del 20esime conferentia international de interlingua.

UMIMappa  Omne membros creative es invitate a crear le optime logo professional pro le 20esime conferentia international de interlingua que habera loco in le urbe con le plus multe sol in Germania in julio 2013.

Le Union Mundial pro Interlingua (UMI) es interessate in audir ab omne personas creative qui pensa que exactemente illes pote crear le logo pro le conferentia jubilari. Le premio es un reduction del precio pro participar in le conferentia que va esser qualcosa toto special, gratias al jubileo.

Le logo dele signalar "Hallo, veni al conferentia de interlingua" e esser le signal de un evento excitante. Illo essera usate in magazines, reclamos, Internet e le placard del conferentia. Un sol demanda es que le logo blau del UMI debe esser parte del logo conferential.

On debe inviar su proposition(es) ante le 15 de januario 2013, que es le Die de Interlingua, a panorama@interlingua.com con un description del idea e, naturalmente, le resultato final.

In le Angulo de Tres Paises

Le 20esime conferentia international de interlingua habera loco in Freiburg in le sudwest de Germania in le si-appellate Angulo de Tres Paises, a saper ubi Germania "incontra" Francia e Suissa. Caritas Tagungszentrum, a poc minutas de ambular ab le ancian parte del urbe, essera le centro conferential.

Le datas del conferentia es de sabbato le 27 de julio a sabbato le 3 de augusto, e le thema essera "Interlingua in le futuro". On labora actualmente con le programma e le arrangiamento practic, assi que il tosto essera possibile inscriber se preliminarmente (preferibilemente con tote le familia). Isto va pro le prime vice esser possibile electronicamente, mesmo si on naturalmente ancora pote inviar un scheda de papiro como antea. Con le inscription debe sequer un deposito, cuje grandor totevia non pote esser fixate, ante que tote le budget del conferentia es preste.

Le programma pro le septimana conferential continera discursos e sessiones e naturalmente varie excursiones in le area.

Lege plus:
Le paginas del 20esime conferentia international de interlingua in Freiburg, Germania, le 27 de julio al 3 de augusto 2013

Initio del pagina