Skip navigation.
Home

Internationalista deveni nove secretario general del UMI

Veterano de interlingua e pionero de technologia moderne, Paolo Castellina es eligite nove secretario general.

UMIPaolo Castellina  Paolo Castellina - 60 annos in junio, italiano de nationalitate, suisso durante un longe parte de su vita e ora habitante in Grande Britannia - deveni le nove secretario general del Union Mundial pro Interlingua.

Ille esseva unanimemente eligite pro le posto pro reimplaciar Petyo Angelov, qui in maio moriva de un infarcto cardiac, solmente 33 annos de etate e solmente 22 dies post esser eligite nove secretario general del UMI.

Le UMI ha membros e representantes in cinque continentes.

Paolo Castellina ha essite active pro interlingua durante decennios. Ille es de nascentia italiano ma habitava durante multe annos in Suissa, ante que ille ante poc annos cambiava domicilio a Grande Britannia, assi sequente su motto personal: "Local e global - duo valores non in contradiction". Paolo Castellina anque esseva le persona, qui in 1997 creava le sito del UMI, www.interlingua.com, e ille es le autor de plure libros, i.a. un grande dictionario de interlingua pro italianos. Ille anque contribue de tempore in tempore a Panorama in interlingua, le international magazin official de novas publicate per le UMI omne duo menses.

Parla cinque - tosto sex - linguas

Le nove secretario general parla e scribe interlingua fluentemente, e ille maestra italiano, anglese, francese e germano - e ha recentemente comenciate studiar le difficile lingua gallese per medio de un curso interactive in Internet.

"Il non es completemente correcte dicer que io es un internationalista. De facto io es alsi un "localista", proque io al mesme tempore vole valorisar e proteger le linguas national e local, super toto le linguas minoritari e moriente, contra le "arrogantia" e imposition del "grande linguas". Io valorisa al mesme tempore Interlingua qua "lingua ponte" pro le communication inter linguas "soveran"," explica Paolo Castellina.

Ille ha sempre habite un preferentia de usar le technologia le plus moderne in su communication. Ille assi ante multe annos registrava historias e contos digitalmente in interlingua e ha apparite anque in Radio Interlingua, e ille ha experimentate sempre con nove methodos de communication. Ille es multo active in Internet in plure dominios.

Paolo Castellina es educate pastor evangelic ma terminava su schola basic con un diploma de geometra (maturitate technic). Su education como pastor habeva loco in Zürich, Suissa, e durante multe annos ille esseva pastor in le Ecclesia Reformate del Canton del Grisiones. Actualmente ille traduce e redige un version del Biblia in interlingua. In 2008 ille cambiava domicilio a Grande Britannia e habita hodie in Tunbridge Wells in le contato Kent con su sposa Alison Bailey Castellina e laborava como travaliator social. Paolo Castellina ha sempre monstrate que ille non ha un problema in separar su activitates professional con le facto que le UMI secundo le statutos debe remaner neutral in questiones religiose e politic. In ultra ille labora como specialista de computatores e de crear sitos in Internet.

Consilio Executive de novo complete

"Le election de Paolo Castellina significa que le Consilio Executive del UMI es de novo complete in omne positiones, e con su experientia e ingagiamento nostre labor pote continuar mesmo plus effectivemente que antea," dice Sven Frank, presidente del UMI post le election del nove secretario general.

Le nove secretario general gaude a comenciar su labores pro interlingua e se senti honorate de haber essite proponite e eligite. Le facto que ille non ja es involvite in le labores de organisationes national significa que ille pote dedicar se plus amplemente a su nove function e le cargas que le attende con le scopo de facer interlingua plus visibile e plus usate in tote le mundo. Ille expecta que le uso del technologia moderne va esser de grande utilitate pro assecurar isto.

Paolo Castellina es un active scriptor de plure blogs, e in multe conferentias international de interlingua ille ha presentate discursos - sovente con le humor que le face sempre appreciate per su publico. Desde 1990 ille es le presidente del Fundation Bakonyi pro Lingua Universal, que supporta multe projectos de interlingua economicamente, e durante un longe periodo ille esseva le presidente del Union Interlingua de Helvetia (UIH) in Suissa. Como isto, ille ha essite anque consiliero general del UMI.

Le Consilio Executive ora consiste de Sven Frank, Germania (presidente), Paolo Castellina, Grande Britannia (secretario general), Martijn Dekker, Nederland (vice-secretario), Alberto Mardegan, Finlandia (tresorero) e Thomas Breinstrup, Danmark (redactor de Panorama in interlingua).

Le UMI esseva establite in julio 1955, quatro annos post le apparition de interlingua. Le UMI es juridicamente registrate presso le autoritates francese.


Le Union Mundial pro Interlingua (UMI), establite le 28 de julio 1955 pro diffunder le international lingua auxiliar interlingua, es un institution pro cooperation international con membros e representantes in cinque continentes. Le UMI esseva registrate juridicamente como association numero 0911004931 per le autoritates francese le 3 de augusto 2006. Le Consilio Executive es responsabile pro le functiones quotidian del UMI. Le Consilio General fixa le strategia e labor al longe lineas. Le UMI publica desde januario 1988 le international magazin de novas Panorama in interlingua (ISSN 0903-2932) omne duo menses. Interlingua esseva publicate in 1951 per le International Auxiliary Language Association (IALA).

Initio del pagina