Skip navigation.
Home

Ex-secretario general retorna a su posto

Petyo Angelov (Bulgaria), nove secretario general del UMI ab le 15 de april 2012.   Carlos Soreto (Portugal), continua como representante de interlingua in Portugal.   Sven Frank (Germania), presidente del UMI. (Photos ab le films presentatori del conferentia de interlingua, 2011.)
         

Petyo Angelov de Bulgaria retorna como secretario general del Union Mundial pro Interlingua.

UMI  Le organisation mundial pro interlingua cambia secretario general e dice benvenite a un previe capacitate qui ora debe assister in le labor offensive de fortificar e promover interlingua in tote le mundo.

Petyo Angelov, 33 annos e ab Bulgaria, es desde le 15 de april 2012 de novo le secretario general del Union Mundial pro Interlingua (UMI), que ha membros e representantes in cinque continentes. Ille esseva unanimemente eligite per le Consilio General del UMI, cuje representantes del organisationes national de interlingua se occupa del strategia a longe vista del UMI, e substitue Carlos Soreto, 51 annos ab Portugal, qui desirava retirar se del posto pro occupar se plenmente con un serie de projectos de interlingua.

Felice de retornar a bordo

Petyo Angelov esseva anque le secretario general del UMI ab 2006 al 1 de septembre 2008. Ille alora desirava retirar se, proque ille esseva eligite presidente de un altere organisation que non le permitteva continuar in le neutral UMI, ma ille ha tote le tempore essite le representante del UMI in Bulgaria.

Petyo Angelov, qui se ha occupate con interlingua desde 1997, ha intertanto establite un compania in le capital bulgare, Sofia, e es ora preste a reassumer su labor in le UMI. Ille veni con ideas pro un plano de activitate pro le UMI usque le conferentia in 2013 e intende utilisar su ample rete de contactos international.

“Io es felice de retornar a bordo. Iste posto jam es satis 'vetule' pro me, e io me senti multo plus realistic iste vice. Io obteneva anque un certe experientia in mi compania e in le parve association que io manea in Bulgaria – experientias que pote monstrar se inevalutabile pro le projectos a venir. Pro me il es un ver placer que mi labor professional e lo que io pote – e vole – facer como nove/vetule secretario general del UMI es in le mesme direction. Il es possibile que le ideas que io va proponer, va in un direction plus 'commercial', e io gaude al collaboration con tote le organisation mundial,” dice Petyo Angelov.

Gratias al ancian secretario general

In 2008, ille esseva substituite al posto per Sven Frank ab Germania, qui in novembre 2010 deveniva le presidente del UMI. Le duo ha durante omne annos habite un bon collaboration. Le plus recentemente, illes collaborava super le organisation del 19ne Conferentia International de Interlingua in Chepelare, Bulgaria, in julio 2011.

“Io da un calide benvenite retro a Petyo Angelov. Io gaude a collaborar con ille super le multe cargas que attende a fin que le UMI pote developpar se e devenir plus forte, durante que nos assecura un forte expansion del uso de – e cognoscentia a – interlingua in tote le mundo. Io desira al mesme tempore regratiar Carlos Soreto pro su labor persistente como secretario general desde 2010. Io es felice que ille va continuar dedicar su capacitates a projectos importante pro le diffusion de interlingua in altere manieras,” dice Sven Frank, le presidente del UMI.

Carlos Soreto continua como le representante de interlingua in Portugal e con su numerose projectos, ante toto lexicographic, de interlingua. Ille actualmente collabora con Piet Cleij de Nederland super un nove “Dictionario de biologia interlingua-anglese” que es preste pro publication.

Le nove Consilio Executive

Le Consilio Executive ora consiste de Sven Frank, Germania (presidente), Petyo Angelov, Bulgaria (secretario general), Martijn Dekker, Nederland (vice-secretario), Alberto Mardegan, Finlandia (tresorero) e Thomas Breinstrup, Danmark (redactor de Panorama in interlingua).

Le UMI esseva establite in julio 1955, quatro annos post le apparition de interlingua. Le UMI es juridicamente registrate presso le autoritates francese.

Initio del pagina