Skip navigation.
Home

Le UMI establi un Section International

Le UMI establi un Section International pro omnes, qui habita in paises que non ancora ha proprie organisationes de interlingua.

UMIMappa del mundo  Tote interessatos e usatores de interlingua, qui habita in paises in le quales il non ancora ha un organisation national, pote ora devenir membros del nove Section International.

Usque hodie solmente paises con organisationes que ha essite acceptate per le Union Mundial pro Interlingua (UMI) como representantes national, ha potite appunctar membros pro le Consilio General del UMI e assi haber influentia al labor strategic e de longe termino del UMI. Per le establimento del Section International, le representation in le Consilio General deveni plus international, e omnes essera representate e habera influentia, anque si illes habita in un parte del mundo ubi interlingua ancora non es vastemente diffundite.

Secretario general coordina le section
Le secretario general del UMI, Carlos Soreto, ha essite appunctate le representante del UMI in le nove consilio del Section International. Carlos Soreto es in le processo de contactar membros individual pro facer les inscriber se como membros del Section International, assi que on pote effectuar un election de duo personas - un representante e un observator - al Consilio General del UMI.

Le membrato annual es fixate a 10 euros + le abonamento de Panorama (dependente si on desira abonamento sur papiro o digital e eventualmente con abonamento duple (= 3 ex.) o triple (= 5 ex.)). On assi paga 20 euros per anno pro esser membro del Section International, si on recipe Panorama in le version digital, e 25 euros, si on lo recipe in le version imprimite.

Reguarda Le statutos del Section International (SI) del Union Mundial pro Interlingua (UMI). On pote discargar le statutos como un file PDF.

Le Union Mundial pro Interlingua ha membros e representantes in cinque continentes. Le UMI esseva establite in julio 1955, quatro annos post le apparition de interlingua. Le UMI es juridicamente registrate presso le autoritates francese.

Initio del pagina