Skip navigation.
Home

UMI ha nove vice-secretario

Juvene nederlandese active entra in le direction del Union Mundial pro Interlingua.

    Le gerentia quotidian del Union Mundial pro Interlingua (UMI) es fortificate e rejuvenate per le election del nederlandese active Martijn Dekker como nove vice-secretario del organisation.

Martijn Dekker, 35 annos, seque Piet Cleij, anque de Nederland, al posto. Piet Cleij, qui inter 1991 e 2005 esseva le secretario general del UMI e desde 2006 le vice-secretario, desira dedicar plus de su tempore pro su labor lexicographic con dictionarios e facer minus de labor administrative. Ille anque conduce le Servicio de Libros UMI, que vende litteratura in e super interlingua a tote le mundo. Ille va continuar collaborar con le Consilio Executive.

Martijn Dekker habita in Groningen in le nord de Nederland. Ille labora como administrator de systemas computatorial e ha un filia de septe annos. Ille, qui parla interlingua, nederlandese, anglese, svedese, un poco de francese e germano, es active con interlingua desde 2000 e ha facite traductiones de software, de paginas web, scriptura e redaction de articulos in le encyclopedia libere Wikipedia in interlingua e adjuta actualmente con le transcription del manuscripto de un de plure libros per le romaniano Toma Macovei (1911-2003).

In plus ille da discursos e seminarios in interlingua super un thema que ha nihil a facer con interlingua, pro un adudientia non-interlinguista usante interlingua activemente in su function como lingua auxiliar international comprensibile a prime vista pro centos milliones de personas.

Martijn Dekker ha participate in le conferentias international de interlingua e le incontros nordic de interlingua in Polonia (2001), Svedia (2002), Bulgaria (2003), Svedia (2004), Svedia (2008) e Germania (2009).

Como nove vice-secretario Martijn Dekker entra in le Consilio Executive del UMI. Illo consiste in ultra de Barbara Rubinstein (Svedia) como presidente, Sven Frank (Germania) como secretario general, Alberto Mardegan (Finlandia) como administrator e aranea de www.interlingua.com e Thomas Breinstrup (Danmark) como le redactor del magazin international de novas Panorama in interlingua.

Martijn Dekker esseva eligite le 15 de septembre 2009.


Lege anque:
Discurso presentate in interlingua - 2008-10-07
Radio Interlingua 010 - Interview de Thomas Breinstrup con Martijn Dekker, interlinguista nederlandese super le interfacie interlinguaphone de Wikipedia
Radio Interlingua 011 - Wikipedia parlante in interlingua: Martijn Dekker lege le articulo super le concepto de populo
Initio del pagina