Tosto le abonatos pote seliger inter un magazin sur papiro o un version digital del Panorama in interlingua.

UMIPanorama in interlingua  Duo del magazines principal de interlingua debe si tosto como possibile apparer in versiones electronic.

Le magazin international de novas, Panorama in interlingua, e le magazin nordic de interlingua, Actualitates, va esser publicate in versiones electronic. Le abonatos assi debe seliger si illes vole le version sur papiro o un version electronic in le formato PDF protegite. Le duo editiones essera identic.

Le version electronic assi non substitue le version imprimite sur papiro ma es un supplemento que sperabilemente pote persuader plus de personas a devenir abonatos e assi supportar le labor de diffunder interlingua. Illo pote esser legite directemente sur le schermo.

Le precio pro le version electronic non ha essite fixate ancora, ma probabilemente illo deveni un poco minor. Le UMI ha expensas a pagar pro mantener i.a. www.interlingua.com, ubi un serie de materiales gratuite es publicate, e dunque debe trovar manieras de ganiar moneta. In omne caso le abonato solmente recipe un del versiones (sur papiro o electronic).

Parallelmente, le reclamo pro PANORAMA essera fortificate in www.interlingua.com. Ci debe esser publicate pro cata edition un tabula de contento e forsan alcun paginas del edition pro attraher plus de attention.