Skip navigation.
Home

UMI debe haber nove secretario general

Petyo Angelov ha decidite quitar su posto post haber essite eligite pro un empleo que es in disaccordo con le neutralitate del UMI. Ille remane al posto usque un successor ha essite appunctate e continua como representante de interlingua in Bulgaria.

  Le Union Mundial pro Interlingua debe haber un nove secretario general.

Petyo Angelov de Bulgaria, qui desde le initio de 2006 ha plenate le posto, ha decidite retirar se, proque ille ha assumite un altere posto professional que non le permitte continuar como gerente quotidian del UMI que secundo su statutos debe remaner neutral.

Petyo Angelov habera 30 annos in novembre. Ille ha laborate con interlingua durante plus que dece annos e ha participate in numerose conferentias international de interlingua.

Ille esseva eligite presidente de un organisation non-governamental, ingagiate politicamente.

"Como presidente de iste organisation io debera representar lo al nivello le plus alte, in le scena politic international, e defender principios que es in disaccordo con le principios de neutralitate e pro-europeismo, predominante in UMI," dice Petyo Angelov.

Ille continua in su function como secretario general usque al election de un successor e remane completemente al disposition del Consilio Executive e del Consilio General del UMI e del nove secretario general. Le UMI ha ora initiate le labor de trovar un successor.

Petyo Angelov continua su labor pro interlingua e remane le representante national del UMI in Bulgaria.

Libere del responsabilitates official, ille pensa melio poter laborar pro i.a. assecurar invenitas per altere canales que le presentes. Ille anque crede que il essera assi plus facile monstrar "le utilitate de nostre instrumento de communication international".

Le Consilio Executive del UMI regretta su decision ma comprende le motivos pro lassar le posto a un altere qui sperabilemente tosto potera esser appunctate.

Initio del pagina