Septe contos de Hans Christian Andersen retorna
Le famose danese scribeva 156 contos, ma illos ha vendite si ben in interlingua que un del libros esseva exhaurite. Ora illo pote esser comprate de novo.
Hans Christian Andersen (1805-1875) es probabilemente le autor le plus famose de Danmark. Su contos ha ganiate fama mundial e es amate per infantes e adultos.
Septe de su contos maestrose ha essite publicate de novo in le traduction excellente in interlingua del danese H.P. Frodelund (1912-1996). Il se tracta de contos famose e minus famose.
Le septe contos es “Le pueretta con le flammiferos”, “Le perseverante soldato de plumbo”, “Le nove roba del imperator”, “Le princessa super le piso”, “Il es absolutemente certe”, “Le prince maligne” e “Post mille annos”.
“Septe Contos de Hans Christian Andersen” esseva publicate in 1975 con illustrationes de professor Gert Tamboer. Le libretto ha durante un periodo essite exhaurite, ma le Union Danese pro Interlingua ha ora facite un nove edition, sin cambios ab le edition original. Le precio es 5 EUR.
Assi infantes, juvenes e adultos in tote le mundo pote entrar de novo in le mundo fascinante de Hans Christian Andersen.