Conversationes, cartas nordic, un mini-dictionario e plure e-libros ha essite addite a www.interlingua.com.

UMIMulte nove materiales in interlingua  Un fluxo de nove materiales in interlingua ha essite addite a www.interlingua.com.

Tres nove episodios del serie de conversationes, "Viages con interlingua", nos porta al processiones paschal in Sevilla in Espania, al plagia e al celebrationes del medie estate in le paises nordic. "Viages con interlingua" es conversationes con un vocabulario quotidian, ubi nos seque le tres amicos Anna, Petro e Paulo a lor viages. Cata episodio es accompaniate per exercitios inspirante, e toto es in interlingua. Duo episodios - "Un visita a un fabrica de bonbones" e "Un visita al plagia" - esseva registrate in audio durante le 16te incontro nordic de interlingua in julio 2018. Tote le 26 episodios e le audio pote esser discargate gratuitemente de www.interlingua.com/instruction e esser usate pro cursos de interlingua, circulos de studio e autostudio.

Un nove manata de "Cartas nordic" de Groenlandia, Svedia e Danmark es anque a disposition gratuite in www.interlingua.com/instruction. Cata carta es un motivo de un del cinque paises nordic (comprehendente in ultra Islanda, Norvegia e Finlandia) con un breve texto descriptive e informative, un mappa que monstra ubi es le loco, e cinque questiones al texto. Toto es in interlingua. Il ha ora 65 cartas nordic a discargar in formato PDF e usar pro cursos de interlingua, circulos de studio e autostudio.

Un mini-grammatica e mini-dictionario interlingua-serbocroato con 2.000 vocabulos frequente, "Interlingua - internacionalni jezik dvadesetprvog vijeka", es a disposition in www.interlingua.com/instruction-national. Le brochure de 24 pp. A5 es in formato PDF, preste a discargar gratuitemente e usar.

Pro portugeses e brasilianos il ha anque nove materiales in www.interlingua.com/instruction-national. Un revidite e multo plus grande "Gramática Essencial de Interlingua em Português", le libretto "Interlingua a solução natural" per Waldson Pinheiro e le "Curso postal de interlíngua" de 690 parolas pro lusophonos pote omnes esser discargate gratuitemente.

Finalmente le Bibliotheca electronic in interlingua ha essite supplementate con anque le "Gramática Essencial de Interlingua em Português" per Cláudio Rinaldi e le obras litterari "Le die le plus curte", "Poemas in interlingua" e "Le naufragio", omnes per le poeta brasilian Jonas Negalha. Anque "Legendas folkloric amazonic" colligite e narrate per Ramiro B. de Castro es ora a disposition grauite como e-libros.