Le collection de conversationes, dialogos con audio e cartas nordic con belle photos pro cursos de interlingua e autostudio deveni plus grande.

UMINove materiales pro cursos  Ancora plus de nove materiales gratuite pro cursos de interlingua o pro autostudio ha essite addite al section "Instruction de interlingua".

"Un interlinguista al mercato" es un parve conversation inter Adam, un tourista qui visita un pais hispanophone e va a un mercato pro comprar fructos e verduras. Ille se arresta ante le barraca de Juanita e se adressa a illa in interlingua. Illa naturalmente responde in espaniol. Le conversation monstra le grande similaritate e comprension inter interlingua e espaniol, que deveni ancora plus clar, proque on al mesme tempore pote audir le dialogo como un file MP3. Le dialogo esseva scribite per Marcus Scriptor, e il es Magne Heie (Norvegia), Kenneth Platter (Svedia) e Inger Maria Olsson (Svedia), qui lege le texto.

Le serie "Cartas nordic" ha essite augmentate per ancora duo cartas postal. Assi le serie comprehende plus que 50 cartas con un motivo ab un del cinque paises nordic - Danmark, Norvegia, Svedia, Finlandia e Islanda - con un breve texto, un mappa que monstra le position geographic e cinque questiones in interlingua al texto. Isto es un excellente maniera de leger e apprender interlingua. On pote seliger le cartas con le photos le plus belle - e apprender multo super le geographia nordic.

Iste materiales es parte del archivo con materiales gratuite que on pote discargar in formato PDF e leger sur un schermo o mesme imprimer sur papiro. Le intention del archivo es dar le possibilitate a trovar facilemente bon materiales que on pote usar in cursos de interlingua, ubi on ha un professor. Ma on pote anque usar los in su casa, si il non ha altere cursistas.

Le materiales anque comprehende le serie con conversationes "Viages con interlingua" con ora 17 episodios, del quales duo ha essite registrate como files MP3. In iste serie on seque le amicos Anna, Petro e Paulo a lor multe viages. Le serie usa un linguage quotidian, assi que on apprende tote le phrases e expressiones pro le die ordinari. Le majoritate del episodios include un folio con exercitios pro le texto. Le section "Instruction de interlingua" anque ha un serie de breve textos amusante super le population del region danese Mols, le molbos, qui es considerate un poco stupide. Il ha explicationes in interlingua e questiones, e le majoritate del episodios anque ha audio como files MP3.

Visita le section "Instruction de interlingua" e discarga tote le materiales gratuite.