Fundation generose assecura reduction del precio de participar in le incontro nordic de interlingua in julio 2016 – ma inscribe te tosto.

UMI15te incontro nordic de interlingua  Gratias a un donation generose del svedese Fundation pro Interlingua, le prime 30 personas, qui se inscribe pro le 15te incontro nordic de interlingua con cursos intensive de interlingua, obtene un reduction del precio de participation de 1.000 coronas svedese.

Le incontro nordic, que ha loco omne duo annos in annos par, es iste anno – pro le prime vice – arrangiate in Danmark, in le citate Tisvilde poc minutas ab le plagia e mar le 27-31 de julio 2016. Le Union Danese pro Interlingua, que lo organisa in collaboration con su organisationes sororal in Norvegia, Svedia e Finlandia, expecta participantes ab anque altere partes del mundo, como sempre. Nam le incontros es un excellente occasion pro usar interlingua activemente in compania international, mesmo si illos naturalmente es destinate primarimente a nordicos, qui se incontra pro parlar super le progressos, activitates e ideas de diffunder interlingua e le cognoscentia al lingua plus in Danmark, Norvegia, Svedia, Finlandia e Islanda.

Le loco conferential es un ancian hotel de banio con le optime mangiar in le citate e tote facilitates besoniate pro un excellente sojorno. Le incontros offere – ultra le conversationes "seriose" super interlingua e le labor de promover lo – excursiones, intertenimento, cursos intensive de interlingua pro comenciantes e pro illes qui desira conversar plus, un agradabile tempore in un agradabile compania e possibilitates ric de usar e parlar interlingua.

Un del excursiones va al castello regal Frederiksborg Slot con su belle laco in le urbe Hillerød.

A www.interlingua.dk/nordic2016 on pote inscriber se (e su familia!), vider photos del centro conferential, apprender como arrivar al citate poc minutas ab le mar e leger altere informationes practic.

Le precio pro participar include omne repastos + quatro pernoctationes + cursos + excursiones + belle ambiente + le mar + participantes agradabile e es solmente 3.300 DKK (+ 350 DKK pro camera singule = 3.650 DKK) ab lunch le 27 de julio a lunch le 31 de julio, inclusive. Le 30 primes obtene le reduction de 1.000 SEK. Il es recommendabile reager tosto, si on prefere un certe typo de camera.

Inscription, informationes e photos: www.interlingua.dk/nordic2016

Lege plus: Invitation al incontro nordic de interlingua in Danmark in 2016