Skip navigation.
Home

Ultime libro humoristic in encyclopedia spiritual

Toma Macovei intertene su lectores per un spisse libro anecdotic e biographic con multe humor.

UMIPerlas spiritual ab le humor universal  19 annos post le apparition del plus recente libro appare ora le quinte e ultime volumine anecdotic e biographic in un parve encyclopedia spiritual in interlingua.

Il se tracta de "Perlas spiritual ab le humor universal", scribite per le superproductive autor romanian Toma Macovei, qui moriva in 2003. Illo es un collection sur 408 paginas A5 de centos de anecdotas arrangiate secundo themas, presentante un intertenimento ric pro multe horas de lectura in un interlingua fluente e capturante e con varie factos historic como condimento.

Toma Macovei lassava post su morte un serie de manuscriptos pro libros anecdotic e biographic. Le quantitate es si abundante que il non usque ora ha habite fortias pro transcriber - e a vices mesmo decifrar sur le tenuissime folios de papiro usate sur ambe lateres - su production enorme. Isto cambia ora, e ancora duo libros - “Le vita anecdotic del homines illustre II” de ca. 150 pp. A5 e “Ab le auro spiritual del scena e del schermo II” de ca. 180 pp. - es in preparation e pote sperabilemente anque tosto esser publicate.

"Perlas spiritual ab le humor universal" seque le prime quatro partes de lo que Toma Macovei mesme appellava su parve encyclopedia del spiritualitate human: “Le vita anecdotic del homines illustre” (1988), “Ab le auro spiritual del scena e del schermo” (1993), “Joieles spiritual” (1994) e “Miscellanea, insolite creationes spiritual” (1996). Omnes monstra su talento de narrar e facer le lector rider. “Perlas spiritual ab le humor universal” presenta anecdotas super personas historic e famose e super situationes quotidian e es assi bon divertimento. Ecce alcun exemplos:

Le romanos, si illes non lo ha sapite e deberea anque illes apprender le latino, non haberea habite plus tempore de conquirer le mundo! (Heinrich Heine)

– Senior doctor, an le operation se terminava con successo?
– Qual doctor? Io es Sancte Petro!

– Io ha recipite un littera anonyme.
– De qui?

"Perlas spiritual ab le humor universal" costa 16 euros e pote esser comprate in linea ci.

Initio del pagina