Skip navigation.
Home

Nove radioactivitate pro interlingua

Radio Interlingua es de novo preste - e narra super le grande arrangiamento estive de interlingua in julio.

UMI  Post un pausa de plure menses, Radio Interlingua es de novo active e comencia per un invitation al combinate conferentia international e incontro nordic de interlingua in Svedia le 29 de julio al 3 de augusto - 50 metros ab le mar.

In emission numero 58, redactor Péter Kovács explica le ration pro le silentio e promitte que le "radioactivitate" va continuar ab ora. Ille anque explica que il es le ultime chance pro inscriber se al 20me conferentia international e 14te incontro nordic de interlingua que habera loco in le citate balneari Åsa, sud de Göteborg al costa west de Svedia, in bellissime natura.

Le arrangiamento es pro tote le familia e continera activitates, cursos (pro nove usatores de interlingua e pro illes, qui ja lo ha usate durante un periodo), excursiones, presentationes e discursos, discussiones super interlingua e multo plus. On pote obtener un reduction de 500 SEK/44 EUR per inscriber se ante le 5 de junio. Le precio pro omne sex dies con camera, mangiar, excursiones etc. es alora solmente 3.500 SEK o 400 EUR.

Radio Interlingua publica cata mense un nove emission totalmente in interlingua sub le redactorato de Péter Kovács, Hungaria, qui in augusto 2008 assumeva le carga. Le emissiones ha devenite multo popular. Milles de personas los discarga in formato MP3 o ascolta directemente in www.interlingua.com/radio. Ci on trova anque omne le previe emissiones de Radio Interlingua.

Visita www.interlingua.dk/nordic2014 pro leger plus e sequer le novas le plus recente e usa le scheda de inscription immediatemente. Vide le programma preliminar pro esser inspirate.

    Inscribe vos ante le 5 de junio 2014 pro reducer le precio

  • Veni 6 dies al "superconferentia nordic" o "festival de interlingua" pro solmente 4.000 SEK/444 EUR.
  • Toto es includite in le pacco: omne repastos + camera con 5 noctes + cursos + excursiones + belle natura vicin al mar + agradabile participantes ab multe paises pro solmente 4.000 coronas svedese/444 euros per persona (ab lunch le 29 de julio al lunch le 3 de augusto, inclusive).
  • Usa le scheda de inscription e inscribe vos al plus tarde le 5 de junio 2014. Alora tu obtene un reduction de 500 SEK per persona. Assi le precio es solmente 3.500 SEK/400 EUR per persona pro omne sex dies.


Initio del pagina