Skip navigation.
Home

Cinque nove viages con interlingua

Iste vice le materiales pro cursos in interlingua invita i.a. a Florentia in Italia, al Valle del Lupos in Danmark e a un famose scala de esclusas in Svedia. Discarga le materiales gratuitemente.

UMI  Le collection de materiales pro cursos in interlingua continua crescer. Ora il es le tempore pro visitar Italia, Svedia e Danmark.

In le serie "Viages con interlingua", nos va ora visitar Florentia (vide le photo) e le village de montania Monteriggioni, ambes in Italia. Le serie es elaborate pro le Vesperes de Interlingua in Copenhagen, Danmark, un gratuite curso de conversation arrangiate per le Union Danese pro Interlingua un vice per mense in le centro del capital danese. Le Vesperes de Interlingua ha continuate desde 1992.

"Viages con interlingua" es un serie con textos con conversationes in interlingua pro assi demonstrar le linguage quotidian. Le dialogos es assatis breve e contine multissime parolas e expressiones que on usa cata die. Varie personas pote prender un rolo e assi conversar. Il ha anque belle photos del destinationes que es visitate, e - pro le ultime "episodios" - il ha un pagina con exercitios amusante e capturante pro le texto, assi que on pote testar, si on ha comprendite toto. Le material es in le formato PDF, assi que on facilemente pote imprimer lo in colores (o blanc-nigre). Il ha ora octo "episodios", e plures va venir.

35 cartas nordic con photos, mappas e questiones
"Cartas nordic" es un altere serie con un carta illustrate de un location in un del cinque paises nordic: Danmark, Norvegia, Svedia, Finlandia e Islanda. Le carta contine un breve texto descriptive del loco e un mappa que monstra le position. Sub le carta il ha sempre cinque questiones al texto. Il ha ora 35 cartas nordic a discargar in le formato PDF.

Le nove cartas veni del famose esclusas in Berg, Svedia (vide le photo), que presenta un tote scala de esclusas como parte del famose Canal Göta. Un altere carta veni de Ulvedalene ("Le valle del lupos") in Danmark, ubi le Theatro Regal con intervallos de tres-quatro annos ha un grande representation de un spectaculo spectacular in aere libere. Le tertie nove carta veni de Mölle, un famose citate balneari in Svedia.

Le cartas nordic originalmente es publicate in le magazin nordic de interlingua, "Actualitates", con duo in cata magazin. Postea, le Vesperes de Interlingua in Copenhagen elabora le questiones pro le texto, e finalmente le cartas es publicate de novo in www.interlingua.com/instruction, del qual on pote discargar un multitude de materiales pro le inseniamento e cursos de interlingua.

Tote le material es in interlingua, assi que illo es universal.

Visita Multe materiales pro le inseniamento de interlingua, e discarga tote le materiales gratuite

Initio del pagina