Le sito didactic Tatoeba in februario attingeva phrase numero 10.000 in interlingua.

  Interlingua attingeva in le fin de februario phrase numero 10.000 in le sito didactic de linguas, Tatoeba.

Un citation per Erich Fromm deveniva le phrase jubilari: "Le education fabrica machinas que age como le homines, e produce homines qui age como le machinas."

Tatoeba es un dictionario lingual, un collection de phrases in multe lingua que on pote consultar in plure altere linguas. Carlos Alberto da Silva Santos de Brasil es le motor detra le developpamento explosive de Tatoeba in interlingua. In le medio de januario il habeva 9.343 phrases in interlingua, un mense plus tarde le 10.000 esseva attingite, e in le initio de martio le cifra habeva augmentate a 10.245, placiante interlingua como lingua numero 29 ante p.ex. lituano, tagalog, greco, norvegiano, tcheco, vietnamese, hindi, catalano e romaniano.

A vices le traduction del phrase solmente existe in poc linguas, a altere vices in multes. Anglese pote esser le lingua intermediator si le traduction directe non existe.

Visita www.tatoeba.org e essaya mesme.


Tatoeba es un large base con phrases-exemplos traducite in numerose linguas. Interlingua es ora lingua numero 29 in rango.