Skip navigation.
Home

Duo nove libros facile - e un grande dictionario

Un novella criminal original in interlingua, cinque contos classic e un grande dictionario svedese-interlingua appareva al mesme die.

  Il es rar que tres libros appare a exactemente le mesme die. Ma duo nove titulos in le serie "Facile a leger in interlingua" e un nove ma totevia ben cognoscite dictionario svedese-interlingua omnes esseva publicate le 1 de decembre.

Le nove serie "Facile a leger in interlingua" consiste ora de cinque titulos, post que le novella criminal "Mysterios in Mexico", scribite per Thomas Breinstrup, e "Contos del foreste", scribite per le autor uruguyan classic Horacio Quiroga, ha essite addite. Le serie debe dar inspiration e crear desiro de leger plus de litteratura in interlingua, e "Facile a leger in interlingua" usa un vocabulario basic del 2.500 parolas describite in "Interlingua - dictionario basic". Omne parolas usate ultra istos es explicate in notas a pede - e sempre in interlingua - sur cata pagina.

"Contos del foreste" es un libro con contos super le aventuras del animales, scribite per Horacio Quiroga (1878-1937). Le contos es scribite pro juvenes in un lingua fresc e plen de humor. Iste libro contine cinque contos – pro le prime vice in interlingua, gratias al bon labor de Italo Notarstefano, qui es un active contributor al litteratura de interlingua - per traductiones e per obras original.

E un tal obra original es "Mysterios in Mexico" per Thomas Breinstrup. Il es un belle die al costa con sol e calor. Harry Johnson ha vacantias, ma durante un visita al citate occurre un robamento in un joieleria, e tosto ille deveni parte del labor pro solver le mysterio como isto ha occurrite – e ubi es le joieles disparite. Isto deveni le comenciamento de un aventura surprendente.

"Facile a leger in interlingua" ha su proprie sito in www.interlingua.com/facilealeger con ligamines directe al titulos. On pote comprar omne le titulos in linea e pagar immediatemente - e si on es rapide, le libros arrivara ante Natal. Le precio del duo nove titulos es sex euros (exclusive porto postal) per libro. Il vale comprar plus de titulos pro assi sparniar le porto postal.

Plure nove titulos es sub preparation in le serie e va apparer durante le menses veniente.

Le grande dictionario svedese-interlingua, o in le lingua original "Svensk-interlingua ordbok", contine 30.000 entratas. Iste libro ha essite publicate ante plure annos ma appare ora in un version modernisate e plus facile a usar. Illo contine varie correctiones e additiones. Le Societate Svedese pro Interlingua (SSI) es le editor del dictionario.


Le novella criminal "Mysterios in Mexico", le cinque contos classic in "Contos del foreste" e le nove dictionario svedese-interlingua omnes ha apparite in decembre.

Initio del pagina