Grande material presenta responsas a multe questiones de dubita - e errores typic.

  Un extense material con bon responsas del uso practic de interlingua es ora a disposition in "Le angulo linguistic".

Durante multe annos le magazin international de novas, Panorama in interlingua publicate per le Union Mundial pro Interlingua, ha in cata edition publicate un pagina con solutiones a questiones typic al usatores de interlingua, "Parola del mense". Tote iste material ha ora essite publicate in www.interlingua.com, assi que omnes pote consultar lo.

Ci on pote trovar explicationes con multe exemplos e assi, sperabilemente, maestrar interlingua ancora plus. Quasi 125 explicationes es a disposition immediate, e illos essera supplementate poco a poco, quando nove editiones del Panorama es publicate. Le explicationes es arrangiate in grande gruppos: Errores grammatic, Un bon stilo, Le anno: saisones, menses e dies, Geographia, Numeros e cifras e Errores typic - e como evitar los.

"Sperabilemente le explicationes pote devenir un bon adjuta al usatores de interlingua e acclarar questiones de dubita, assi que le qualitate del uso practic de interlingua deveni plus grande in scripto e in parlar. Ora on pote investigar mesme le explicationes pro esser inspirate a studiar nove faciettas de interlingua," dice Thomas Breinstrup, redactor in chef del Panorama.

Le explicationes comprehende omne editiones de Panorama usque le fin de 2012. Le material del editiones in 2013 va sequer plus tarde.