Skip navigation.
Home

Edgar Allan Poe e Alexander Gode in bibliotheca electronic

Ancora duo nove e-libros ha essite addite al Bibliotheca electronic in interlingua, uno con audio.

UMI  Un historia horripilante e un manifesto historic es le additiones le plus recente al sempre plus grande Bibliotheca electronic in interlingua.

"Le conto gothic "Le Barril de Amontillado" per le famose autor american Edgar Allan Poe (1809-1849) e le "Manifesto de Interlingua" per Alexander Gode, le presidente del Union Mundial pro Interlingua (1955-1970) e redactor final del "Interlingua-English Dictionary", pote ora esser gratuitemente discargate in le formatos PDF e EPUB como e-libros. Le vice-secretario del UMI, Martijn Dekker, ha in ultra registrate "Manifesto de Interlingua" como audio, assi que on pote audir le texto.

Amontillado es un sorta de sherry deliciose, e illo es usate per le narrator Montrésor pro prender vengiantia de su amico Fortunato qui le ha insultate. Le amor de vino duce le duo a in le cellarios obscur de vino in iste famose conto de 1846, que ha essite traducite in interlingua per Patricio Negrete.

Alexander Gode scribeva su "Manifesto de Interlingua" pro le 3tie Congresso International de Interlingua in Tours, Francia, in 1959. Ille non mesme poteva participar, ma in le manifesto ille presenta su ideas e opiniones super interlingua e como promover lo.

Le Bibliotheca electronic in interlingua es un sempre crescente collection de litteratura gratuite in interlingua - litteratura professional, belletristica e libros pro infantes. On pote leger le e-libros directemente sur le schermo o discargar pro su tabletta computatorial o e-lector, o audir alcunos sur un sonator MP3.

Visita le Bibliotheca electronic in interlingua e selige inter le centos de horas de lectura - absolutemente gratuitemente.

Le Barril de Amontillado   Manifesto de Interlingua
Initio del pagina