Skip navigation.
Home

Associato distinguite del UMI e premiato Nobel moriva

James M. Buchanan, receptor del Premio Nobel e associato distinguite del UMI, moriva le 9 de januario.

UMIJames M. Buchanan  James M. Buchanan, un del economos le plus grande in le historia e desde 1990 associato distinguite del Union Mundial pro Interlingua (UMI), moriva le 9 de januario, 93 annos de etate.

"James Buchanan illuminava le proceduras de decisiones politic," nota le magazin economic The Economist in su necrologia. Le jornal american Wall Street Journal le appella "un del economos le plus grande in le historia".

James "Jim" McGill Buchanan nasceva le 3 de octobre 1919 e, malgrado su nomine familial, ille habeva nulle relation al 15nte presidente del SUA. Post servir in le marina durante le Secunde Guerra Mundial ille ganiava un doctorato de economia al Universitate de Chicago e apprendeva ci le poter del mercatos libere e le practica de defiar le vaccas sacrate.

Ille revolutionava le maniera, in le qual economos e scientistas politic pensa super le relation de individuales al collective, ante toto le collective del governamento. Su obras aperiva le porta pro examinar como le interesse in se mesme del politicos e le fortias non-economic ha effecto al politica economic governamental. Su theorias, developpate in collaboration con coautor Gordon Tullock, es hodie appellate "economia del selection public" o - per James Buchanan mesme - "le Schola de Virginia". Il esseva iste theoria que le portava a Stockholm in 1986, ubi le rege svedese, Carl XIV Gustaf, le dava le Premio Nobel in Scientia Economic.

In 1990, le UMI le appunctava le prime associato distinguite. Le associatos distinguite recognosce le labor seriose que le UMI face pro promover interlingua como instrumento moderne de communication international. James M. Buchanan sequeva con interesse le labor del UMI e inviava regularmente salutes al conferentias international de interlingua.

Su obras complete ha apparite in vinti volumines in le casa editorial Liberty Fund.

James M. Buchanan moriva in Blacksburg in Virginia, SUA.

Le Panorama in interlingua publicara in su edition de januario-februario 2013 un necrologia plus extense del associato distinguite del UMI.

Lege plus: www.interlingua.com/historia/biographias/buchanan.htm

Photo de James M. Buchanan: Wikipedia.org

Initio del pagina