Grammatica de interlingua in nove version
Le tertie edition del classico "Grammatica de Interlingua" ha apparite.
Finalmente appare le tertie version del classico, "Grammatica de Interlingua", que da le responsas a como usar interlingua correctemente.
Le "Grammatica de Interlingua" esseva scribite per Karel Wilgenhof (1927-2009), secretario general del Union Mundial pro Interlingua (UMI) inter 1970 e 1982. Ille finiva le tertie version del grammatica poco ante su morte, ma altere cargas postponeva le publication del libro usque ora.
Le utilitate de interlingua como lingua international non pote esser melio demonstrate que per un edition in interlingua super interlingua. Sovente le exemplos es le methodo le melior pro apprender e comprender grammatica. Le textos in iste presentation es clar e precise, e le grammatica da un introduction solide e profunde a interlingua. Karel Wilgenhof cognosce su material in omne detalios e succede presentar lo con un multitude de exemplos, assi que il es facile cercar e apprender.
Le precio corresponde a 6,00 euros, exclusive le porto postal.