Skip navigation.
Home

Radio Interlingua: Ab Brasil a Bulgaria e Barcelona

|

In un viage a transverso del mundo Radio Interlingua presenta cantos, musica, salutes e un carta postal auditive.

UMIRadio Interlingua  Salutes ab Brasil, reportages de Bulgaria e un carta postal auditive de Barcelona es parte del contento del 43tie emission de Radio Interlingua.

Le podcast de 23 minutas non solmente es un viage a transverso del mundo ma anque un presentation ric de voces e occurrentias.

Le redactor hungare, Péter Kovács, fini le presentation de su diarios auditive del 19ne Conferentia International de Interlingua in Bulgaria in julio 2011 con le pecia registrate in le ultime vespere commun. Memorante le occurrentias del festa ille presenta le registration del duetto de Thomas Breinstrup de Danmark e Petyo Angelov de Bulgaria del pecia "Le garson a conferentia" per le compositor svedese Gunnar Wennerberg. Illo ha devenite un classico al conferentias de interlingua.

Pois le parola va a Brasil, ab ubi Erick Fishuk saluta le ascoltatores. Le actualitates de interlingua es presentate, ante que Thomas Breinstrup - redactor del magazin official del UMI, Panorama in interlingua, invia un carta postal auditive ab le corde del urbe international espaniol Barcelona, le strata pedestre Las Ramblas, e i.a. narra como interlingua es utilissime anque in iste parte de Europa.

Como sempre, le emission de Radio Interlingua anque contine musica.

Radio Interlingua publica cata mense un nove emission totalmente in interlingua sub le redactorato de Péter Kovács, Hungaria, qui in augusto 2008 assumeva le carga. Le emissiones ha devenite multo popular. Milles de personas los discarga in formato MP3 o ascolta directemente in www.interlingua.com/radio. Ci on trova anque omne le previe emissiones de Radio Interlingua.

Initio del pagina