Skip navigation.
Home

Conferentia 2011: Apertura official dominica

|

Chepelare
Visita le pagina official del 19ne Conferentia International de Interlingua

Le presidente e le secretario general del UMI aperi le 19ne Conferentia International de Interlingua in Bulgaria in julio 2011, ubi on pote passar un examine official Il ha ancora duo septimanas pro inscriber se.

UMI  Le apertura official del 19ne Conferentia International de Interlingua in Bulgaria per le presidente e le secretario general del Union Mundial pro Interlingua, Sven Frank e Carlos Soreto, habera loco dominica matino.

Illo esseva originalmente planificate pro sabbato tarde postmeridie, ma le connexiones de aviones a Bulgaria se ha monstrate minus frequente que expectate, dunque multes non pote arrivar in le aeroporto de Sofia ante le postmeridie. Transporto commun es arrangiate del aeroporto a Chepelare, ma le arrivata essera troppo tarde pro le programma original. Pro assecurar un apertura calme, on in vice habera sabbato vespere pro preparationes e conversationes.

Cursos con examine
Le curso pro comenciantes essera de novo dirigite per le sorores francese, Alix Mahé-Potet e Madeleine Mahé, qui con grande successo arrangiava le curso durante le conferentia in Germania in 2009. Le curso de conversation pro illes qui sape melio interlingua, habera Sven Frank como professor principal. Il habera cata die sessiones assi que on vermente pote usar le lingua - anque durante le sessiones de labor, le excursiones, le conversationes durante le vespere etc.

"Pro le prime vice vos pote participar in un examine a nivello B1 del quadro commun pro linguas del Union Europee e assi reciper un certificato del UMI que es utile pro vostre profession," dice Sven Frank.

Le conferentia que habera loco le 23-30 de julio 2011 es un optime maniera de crear contactos con altere personas ab tote le mundo in omne etates. Le arrangiatores assi incoragia omnes a inscriber se con lor familias.

Illes, qui non ancora se ha inscribite, debe hastar. Le data de inscriber se ha essite cambiate al 1 de maio, e le arrangiatores spera assi (re)vider ancora multe plus de participantes de tote le mundo.

Chepelare, un famose citate montan 230 km al sud del capital Sofia, es situate in le montanias e assi ha agradabile temperaturas mesmo in le alte estate. In ultra, illo es le citate con le plus multe sol in le pais - 270 dies per anno.

Lege plus: Le pagina del 19ne Conferentia International de Interlingua con informationes recente + scheda de inscription (in formato PDF)
Reguarda le film "Nulle calma in Kalmar" in interlingua super le incontro nordic de interlingua in 2010 in Svedia

Initio del pagina