Interview post le feria le plus grande de libros in Scandinavia que quasi 100.000 visitava, e ubi il habeva un stand de interlingua.

UMIBok & Bibliotek  Radio Interlingua reporta in su emission de septembre 2010 super le grande feria de libros in Göteborg, Svedia, ubi il habeva un stand special pro interlingua.

Le Societate Svedese pro Interlingua (SSI) esseva presente pro presentar libros, magazines, litteratura e brochures informative de interlingua, quando "Bok & Bibliotek" (Libro & Bibliotheca) habeva loco le 22-26 de septembre in le secunde plus grande urbe svedese. (Vide le photo a dextere con Esko Kangas del SSI.) Quasi 100.000 personas visitava le feria, inter illos multe autores famose.

Radio Interlingua ha parlate con Erik Enfors, le vice-secretario del Societate Svedese pro Interlingua, qui narra super le labor e le resultatos del feria.

Le emission de septembre dura 15 minutas e contine anque le recente actualitates in interlingua.

Radio Interlingua publica cata mense un nove emission totalmente in interlingua sub le redactorato de Péter Kovács, Hungaria, qui in augusto 2008 assumeva le carga. Le emissiones ha devenite multo popular. Milles de personas los discarga in formato MP3 o ascolta directemente in www.interlingua.com/radio.

Lege anque: Interlingua in grande exposition de libros