Skip navigation.
Home

Famose manual publicate in espaniol

Ora veni le version in espaniol - le lingua numero duo del mundo - de "Interlingua - instrumento moderne de communication international".

UMIInterlingua - instrumento moderne de communication international  Solmente un poco plus que duo menses post que esseva publicate le version anglese, le famose manual "Interlingua - instrumento moderne de communication international" ora appare in ancora un del linguas le plus grande in le mundo, espaniol.

Assi le manual in 30 lectiones ha apparite in totalmente 14 linguas e assi continua esser le manual le plus traducite. Illo es scribite per professor gymnasial, fil. mag. Ingvar Stenström, qui es le secretario del Societate Svedese pro Interlingua, e qui durante plure decennios ha inseniate interlingua in le gymnasio in Svedia in le disciplina cognoscentia lingual general. Le alumnos ci apprende comprender le parolas estranier in svedese, ma in vice de inseniar le elementos latin e grec passive Ingvar Stenström ha usate interlingua, assi que le alumnos anque ha obtenite un lingua que illes pote usar pro communication international.

30 lectiones

Le curso super Hugo e Anna consiste del 30 lectiones in le parte Textos e le Commentario in diverse linguas, ora anque espaniol, que es parlate per circa 400 milliones como prime lingua. Espaniol assi es le secunde lingua in grandor mesurate de parlatores native. Josu Lavin, informator de interlingua pro le Pais Basc, ha in admirabilemente breve tempore traducite e adaptate le Commentarios a espaniol.

"Interlingua - instrumento moderne de communication international" appareva pro le prime vice in 1972, publicate per Esselte Studium, le casa editorial le plus grande de materiales pro le inseniamento in Scandinavia.

Le version espaniol combina - como le version anglese - le Textos e Commentario in un volumine, bellemente illustrate per le le illustrationes original (in ambe sensos del parola) per le svedese Lennart Jäger.

Compra lo directemente in Internet

On pote comprar e pagar le 155 paginas in formato A5 directemente in Internet per le casa editorial Lulu del adresse http://www.lulu.com/content/paperback-book/interlingua/8098521 pro - in Europa - 12,92 euros inclusive le porto postal. - Le curso in multe altere linguas es vendite per le Servicio de Libros UMI.

Plure versiones national del curso famose es in preparation. Ante breve apparera un nove version german, reelaborate per Sven Frank, le secretario general del Union Mundial pro Interlingua.

Initio del pagina