Skip navigation.
Home

Un pagina super conferentia in brochure official

Le libretto de Kirchheimbolanden memora, quando le mundo veniva al citate german pro le conferentia de interlingua.

UMI  Le arrivata del mundo al citate charmante german Kirchheimbolanden in julio 2009 echoa ancora.

Kirchheimbolanden, proxime a Frankfurt am Main in le parte west de Germania, esseva le hospite del 18ve Conferentia International de Interlingua con participantes de tote le mundo. Le burgomaestro Klaus Hartmüller e le vice-burgomaestro Peter Stumpfhäuser assisteva durante le septimana multo laboriose e productive.

In le salute a omne ex-citatanos de Kirchheimbolanden, "Heimatbrief der kleinen Residenz", de decembre - un libretto de 104 paginas con photos e multissime informationes, il ha un pagina complete con texto e photo super le conferentia. "Die Welt zu Gast in Kibo" (Le mundo como visitator in Kibo) es le titulo del articulo que describe, como interlingua es comprendite per 600 milliones de personas in tote le mundo. Le articulo anque mentiona que le nove Union German pro Interlingua cata anno va incontrar se in Kirchheimbolanden e establir in le libreria local un section con litteratura in interlingua. Le sito de Internet de Kirchheimbolanden ja saluta le visitatores in interlingua.

Justo supra le photo del gruppo durante un ambulatura in le citate, es citate Jeanne Martinet de Francia, qui in le etate de 90 annos esseva le participante le plus vetere del conferentia. Illa dice (in interlingua, naturalmente):

"Le conferentia in Germania esseva un grande successo, e le Kiboneses es multo amabile. In le futuro nos pote organisar plus cursos de interlingua pro juvenes e adultes pro facer Kibo le urbe de interlingua in Germania."


Lege anque:

18ve Conferentia International de Interlingua - toto super le conferentia

Heimatbrief der kleinen Residenz Heimatbrief der kleinen Residenz

Initio del pagina