Skip navigation.
Home

Panorama publica toto super le conferentia

Tote le edition de julio-augusto del magazin Panorama in interlingua va tractar le 18ve Conferentia International de Interlingua.

  Tote le 28 paginas del edition de julio-augusto del international magazin de novas Panorama in interlingua va tractar le justo finite e multo successose 18ve Conferentia International de Interlingua in Kirchheimbolanden, Germania.

"Le conferentia esseva un grande successo, e le atmosphera esseva si creative e inspirante. Pro isto il ha multo a narrar, e isto va plenar tote le edition de julio-augusto, que io actualmente redige pro poter inviar lo al imprimeria si tosto como possibile, sperabilemente durante iste septimana," dice Thomas Breinstrup, le redactor-in-chef del Panorama, qui con intention ha retardate le publication pro poter describer le multe resultatos del conferentia.

Aperite per le vice-burgomaestro
Le magazin essera plen de novas, reportages, interviews, notitias e - naturalmente - multe photos del conferentia de interlingua que esseva aperite per le vice-burgomaestro de Kirchheimbolanden, Peter Stumpfhäuser, le 25 de julio e durava usque le 1 de augusto. Il habeva participantes de 18 nationes.

Isto significa que le columnas normal in le magazin non appare iste vice ma retorna in le edition de septembre-octobre.

Le sito del Union Mundial pro Interlingua (UMI), www.interlingua.com, anque poco a poco va informar super le conferentia, como le Radio Interlingua ha facite un longe serie con interviews que pote esser ascoltate durante le emissiones veniente.


Le secretario general del Union Mundial pro Interlingua (UMI), Sven Frank (a sinistre), aperi le 18ve Conferentia International de Interlingua insimul con le vice-burgomaestro de Kirchheimbolanden, Peter Stumpfhäuser. Photo: Kathrine Breinstrup

Initio del pagina