Skip navigation.
Home

Un mense extra pro inscriber se al conferentia

Ancora un mense a disposition pro inscriber se al conferentia de interlingua in Germania in le fin de julio.

  Omne interessatos de interlingua ha ora usque al 1 de maio pro inscriber se al 18-ve conferentia international de interlingua in Germania in le fin de julio.

FACTOS DE KIRCHHEIMBOLANDEN

Conferentia 2009Visita le pagina principal del 18-ve Conferentia International de Interlingua
• Kirchheimbolanden es un parve urbe con circa 8.400 habitantes, situate circa al medio inter le centro technologic Kaiserslautern e le urbe universitari Mainz, directemente al "Strata Imperial" (Kaiserstraße) de Napoleon.
• Le connexiones traffical es optimal. Il essera facile attinger le urbe per avion, traino o auto.
• Kirchheimbolanden ha un centro medieval e assi es plen de historia. Inter plure visitatores famose esseva le compositor Wolfgang Amadeus Mozart, qui sonava in 1778 le organo in le ecclesia. Le castello ancian es situate al montania Donnersberg, 687 metros alte.
• Lege plus (in germano, anglese e francese) del urbe in www.kirchheimbolanden.de

Le limite de inscriber se ha essite prolongate usque le 1 de maio, post que multes se ha adressate in le ultime momento con questiones practic. Le organisatores ora spera que le mense extra va dar le calma necessari pro le inscriptiones (trova le scheda de inscription ci) - e naturalmente que le mense extra dara multo plus de participantes.


Memora: le 1 de maio

Post le 1 de maio il non plus es possibile assecurar cameras, dunque omnes es incoragiate reager rapidemente, si illes desira un typo special de cameras (singule, duple, etc.).

»Le participantes ha duo optiones de dormir: In le centro del conferentia o in un hotel vicin. Le cameras in le centro es limitate e le medietate es ancora reservate per participantes. Le UMI ha un option a omne cameras del hotel usque al 1 de maio. Ab iste data le participantes recipe cameras in le centro si vacue. Quando le cameras omnes es reservate, le personas qui se inscribe postea, debe organisar le habitation mesme. Memora que il es impossibile adaptar le camera al etate, status familial o preferentias post le prime de maio. Dunque, participantes qui se inscribe al ultime die, lo face a proprie responsabilitate,« dice Sven Frank, organisator in chef del conferentia e secretario general del UMI.

Un septimana in "interlinguia"

Le conferentia de interlingua essera arrangiate vicin a Frankfurt le 25 de julio al 1 de augusto 2009. Le parve urbe Kirchheimbolanden, a 80 km sudwest de Frankfurt am Main, essera le centro del mundo de interlingua durante iste septimana, quando usatores e interessatos se assemblara pro discuter planos de e in, conversar in, intertener se in e simplemente usar interlingua.

Le precios de participation va esser inter 295 e 425 euros dependente del sorta de camera que on desira (camera singule, camera duple etc.). Le precio include toto: pernoctation, repastos, excursiones etc.

Pro tote le familia - con curso pro juvenes

Le conferentia va poner peso al familia e infantes. On planifica arrangiar un curso special pro le infantes, parallelmente con le curso traditional pro comenciantes e le curso de conversation.

Ma il anque habera activitates pro le membros del familias qui non participa directemente in le sessiones del programma ordinari, ubi on discute planos pro promover interlingua ancora plus e excambia experientias de lo que occurre in le differente paises.

»Si vos non participa iste anno, vos va regrettar lo multo!« dice le secretario general.

Initio del pagina