Skip navigation.
Home

Duo nove libros in interlingua

Diligente autor italian ha ancora duo libros preste - e un tertie se developpa.

UMIIo les videva volar  Le diligentissime autor italian Onofrio Notarstefano ha publicate duo nove libros in interlingua.

Le prime es un reedition, "Le contos del Bosco Ancestral in interlingua". Le 244 paginas es un collection de 37 contos re intolerantia, religiones e genocidios, re homines vincite e - multo - re cattos. Le libro es dedicate a un catto special, que ora non es, ma que, in un del momentos plus belle del vita del autor, le ha facite sentir anque se un catto. Le libro pote esser comprate ci: http://www.lulu.com/content/478801 pro 16,50 euros.

"Io les videva volar e altere contos in interlingua" es un libro completemente nove per le mesme autor. Le 138 paginas costa 14,50 euros, e Onofrio Notarstefano presenta su obra assi:

"Io ha nascite in Napoli e illac io ha passate quasi le totalitate de mi vita. Ora io habita alterubi. Un persona qui scribe non pote narrar de mundos que non ha essite le sues. Ma in iste breve contos io non ha volite narrar del gente de Napoli. Assi, pro me, Napoli, con su antique muros grec, ha essite solo un vacue theatro sin personages real, ubi io ha inserite personas inexistente, completemente inventate, fructo de mi phantasia."

"Io les videva volar" pote esser comprate ci: http://www.lulu.com/content/4860966.

Onofrio Notarstefano ha traducite numerose pecias del litteratura mundial pro i.a. le magazin official del Union Mundial pro Interlingua, Panorama in interlingua, ille ha mesme scribite multe novellas, e ille ha contribuite anque al Bibliotheca electronic in interlingua. Ille prepara actualmente ancora un libro in interlingua.

Initio del pagina