Skip navigation.
Home

Autor del bon soldato Švejk in interlingua

  Le autor del romance famose "Le bon soldato Švejk" deveni parte del Bibliotheca electronic in interlingua, publicate ci in www.interlingua.com.

Le jornalista e satirico tchec, Jaroslav Hašek (1883-1923) scribeva su feroce satira antimilitarista, que ha essite traducite in sexanta linguas, ma ille scribeva anque circa 1.500 contos breve. Un selection de illos ha ora essite publicate in interlingua in le e-libro "Quatro contos e duo scriptos politic", traducite per Italo Notarstefano de Italia. Hašek esseva un genial scriptor, un infatigabile burlator e un grande bibitor.

Le Bibliotheca electronic in interlingua es un collection de e-libros, redigite e publicate per le Union Mundial pro Interlingua (UMI) in www.interlingua.com. Le collection consiste de textos de qualitate que on pote discargar e leger sur un schermo computatorial - o imprimer sur papiro, secundo su preferentias personal.

Le e-libros in interlingua demonstra le ric varietate de textos original o traducite, belletristic o professional, que existe in le litteratura de interlingua. Le e-libros normalmente es editiones con un limitate numero de paginas; libros plus grande, imprimite sur papiro, pote esser comprate per le Servicio de Libros del UMI.

Visita le Bibliotheca electronic in interlingua per cliccar in le navigation a sinistre. On debe registrar se como usator de www.interlingua.com pro obtener accesso al bibliotheca.

Initio del pagina