Solmente un mense post que un curso de interlingua in 15 lectiones esseva presentate in Internet per le Union Norvegian pro Interlingua, veni un version italian del mesme curso.

Gratias al labor de Italo Notarstefano, le organisation Interlingua italia pote publicar "Corso base di Interlingua" (Curso basic de interlingua) in su sito in Internet al adresse http://conto.altervista.org/corso.html. Le curso es un version italian del curso scribite pro daneses per Thomas Breinstrup, le secretario del Union Danese pro Interlingua. Illo es publicate in formato PDF lection post lection, assi que on pote discargar lo e apprender le circa 750 parolas. Le prime dece lectiones forma un historia complete del familia Hansen, qui va a Scotia pro visitar lor amicos. Il ha explicationes grammatic e exercitios pro cata lection. Le ultime cinque lectiones es conversationes plus longe.

Le version norvegian, que inspirava al nove edition italian, esseva traducite e adjustate per Åsmund Knutson, presidente del Union Norvegian pro Interlingua, e le curso - in ambe linguas - es illustrate per Henrik Breinstrup, le patre del autor.

Existe - ma solmente in danese, que es multo similar al norvegiano - un libro de exercitios extra pro le curso.

Le intention es plus tarde registrar tote le curso in formato MP3, assi que on pote ascoltar le textos in interlingua.

Tote le materiales del curso es ponite a disposition libere ma remane coperite per le derecto de autor. Isto significa que on naturalmente pote usar lo personalmente, ma que il non es permittite distribuer lo a alteres, ni publicar lo in altere manieras, p.ex. per altere sitos in Internet o sur CDs/DVDs, sin le permission in scripto del possessores del derecto de autor.

Un version german del curso anque es sub preparation.