Skip navigation.
Home

75.000 ha visitate www.interlingua.com

  Plus que 75.000 ha ora visitate le sito official del Union Mundial pro Interlingua al adresse www.interlingua.com desde januario 2006.

Le nove record esseva passate in le medietate de octobre. Le sito esseva relanceate le 15 de januario 2006, al "Die de Interlingua", ubi organisationes e interessatos in tote le mundo face effortios commun pro crear interesse de interlingua.

Le UMI ha essite in linea in Internet desde 1997. Le adresse www.interlingua.com esseva comprate e activate durante le 13-tie conferentia international de interlingua in Strasbourg, Francia. Desde alora le sito se ha developpate sempre plus pro presentar e documentar interlingua professionalmente. Al mesme tempore, le sito ha devenite un boteca de autoservicio con multe materiales in scripto e recentemente anque in formato de MP3 pro ascoltar. Le intention es adder, plus tarde, anque video, assi que on pote anque vider personas qui parla interlingua.

Le UMI spera que visitatores e membros va adjutar in ameliorar constantemente le nove www.interlingua.com per commentarios constructive, propositiones concrete a cosas que pote devenir melior, e ante toto propositiones a plus de contento interessante. Es impossibile promitter que tote propositiones pote esser realisate, ma le redaction del www.interlingua.com va studiar con grande interesse tote propositiones que arriva. Usa le formulario in Contacto e invia ideas, propositiones e commentarios al administrator del sito ("webmaster") - selige lo in le cassa. Es essential pro le developpamento continue del sito, que multes presenta lor commentarios.

Initio del pagina