Skip navigation.
Home

Curso pro norvegianos in Internet

  Norvegianos - e le altere scandinavos - pote ora sequer un curso de interlingua in 15 lectiones per Internet.

Le Union Norvegian pro Interlingua ha publicate "Interlingua kurs for begynnere" (Curso de interlingua pro comenciantes) in su sito in Internet al adresse www.interlingua.no. Le curso es un version norvegian del curso scribite pro daneses per Thomas Breinstrup, le secretario del Union Danese pro Interlingua. Illo es publicate in formato PDF lection post lection, assi que on pote discargar lo e apprender le circa 750 parolas. Le prime dece lectiones forma un historia complete del familia Hansen, qui va a Scotia pro visitar lor amicos. Il ha explicationes grammatic e exercitios pro cata lection. Le ultime cinque lectiones es conversationes plus longe.

Åsmund Knutson, presidente del Union Norvegian pro Interlingua, ha traducite e adjustate le version norvegian del curso que es illustrate per Henrik Breinstrup, le patre del autor.

Existe - ma solmente in danese, que es multo similar al norvegiano - un libro de exercitios extra pro le curso.

Le intention es plus tarde registrar tote le curso in formato MP3, assi que on pote ascoltar le textos in interlingua.

Tote le materiales del curso es ponite a disposition libere ma remane coperite per le derecto de autor. Isto significa que on naturalmente pote usar lo personalmente, ma que il non es permittite distribuer lo a alteres, ni publicar lo in altere manieras, p.ex. per altere sitos in Internet o sur CDs/DVDs, sin le permission in scripto del possessores del derecto de autor.

Le Union Norvegian pro Interlingua anque presenta un curso anglese-interlingua in su sito in Internet.

Initio del pagina