logo
Publicate per le Union Mundial pro Interlingua (http://www.interlingua.com)

Conferentia de interlingua non possibile a effectuar

Per Thomas
Create 2013-07-04 15:52

Le UMI discute plure alternativas pro assecurar que le ideas e inspiration pote florescer totevia.

UMI

UMI  Cambios impreviste significa que le Union Mundial pro Interlingua (UMI) debe cancellar le planificate conferentia international de interlingua in Freiburg, Germania, iste anno. Plure alternativas es discutite in vice.

Le conferentias international de interlingua ha sempre essite organisate pro assecurar un certe qualitate. Grande effortios ha essite ponite in trovar precios basse, pernoctation in locos commode, repastos de tote le die (jentaculo, lunch e cena) includite, salas conferential moderne, un programma attractive e ben variate, cursos de interlingua e discursos actual e representative, e participantes international de si multe paises como possibile.

"Ante duo septimanas le UMI recipeva le information que le centro conferential voleva modificar le contracto, proque lor calculation principal esseva incorrecte. Le precios assi deveniva si alte, que le UMI non poteva assecurar le qualitate del conferentia, e nos habeva dubitas del fide de iste cooperation," explica Sven Frank, presidente del UMI e organisator principal del conferentia.

Participantes de tres continentes
Participantes de tres continentes se habeva inscribite pro le conferentia, e un firma german habeva entrate como protector.

"Pro evitar altere problemas inexpectate, le consilio executive del UMI cercava alternativas in le vicinitate pro mantener le conferentia in Freiburg, al qual le participantes habeva planificate lor viages. On trovava duo centros que esserea un possibilitate, ma illos regrettabilemente non esseva aperte al periodo, lo que on non pote cambiar ante si breve tempore," Sven Frank dice.

Le sol solution assi ha essite cancellar le arrangiamento, e omne participantes ha essite informate immediatemente.

Conferentias regional e possibilitates digital
Le UMI ora discute possibile alternativas que include conferentias regional e possibilitates digital, probabilemente como un evento continuate con sessiones e presentationes mensual in vice de un septimana concentrate.

"Isto naturalmente non pote substituer un 'ver' conferentia, ubi on se incontra personalmente e ha dedicate multe dies a interlingua. In tal conferentias, le ideas e le inspiration floresce, e on collabora in manieras multo plus intense, durante que on incontra nove amicos pro le futuro. Pro isto nos va effortiar nos le plus multo pro arrangiar un apte substitution al conferentia estive que nos regrettabilemente non pote haber," dice le presidente del UMI.

Il es le spero que novas tosto pote esser publicate in www.interlingua.com, e naturalmente omnes, qui se inscribeva pro le conferentia, va esser informate directemente.


Adresse de fonte:
http://www.interlingua.com/official/2013-07-04-conferentia