logo
Publicate per le Union Mundial pro Interlingua (http://www.interlingua.com)

Invitation: Benvenite al conferentia de interlingua 2013 in Freiburg

Per Thomas
Create 2012-08-27 20:33

20e Conferentia International de Interlingua
del Union Mundial pro Interlingua (UMI)
“Interlingua in le futuro”

le 27 de julio ~ 3 de augusto 2013  |  Benvenite a Germania!

Information [0] • ↓Invitation↓Invia un salute al conferentia [0] • Programma [0]


20me conferentia international de interlingua
Le centro conferential essera Caritas Tagungszentrum, situate proxime al ancian urbe. Photo: Caritas Tagungszentrum

Le vintesime (20me) conferentia international de interlingua habera loco in un angulo international de Germania con le plus de sol in tote le pais.

UMIMappa  Prende un calendario, e nota le datas: Le Union Mundial pro Interlingua (UMI) invita omne membros e lor familias al 20me conferentia international de interlingua in Freiburg im Breisgau, Germania, del 27 de julio al 3 de augusto 2013.

Ja poc septimanas post le fin del 13tie incontro nordic de interlingua in Svedia, le UMI es preste con le datas e loco del conferentia in le anno veniente. Le arrangiatores spera que illo devenira le conferentia le plus grandemente visitate in le historia de interlingua, e le preparationes ja progrede ben.

FreiburgFreiburg im Breisgau (brevemente: Freiburg) es situate in le si-nominate Angulo de Tres Paises - Germania, Francia e Suissa - e es assi de natura international. Al mesme tempore illo mantene le position como le urbe le plus calide e con le plus de sol in tote Germania. Illo ha 214.000 habitantes e es situate vicin a Schwarzwald, le famose Foreste Nigre, in le stato Baden-Württemberg. Freiburg es facilemente accessibile per ferrovia (station: Freiburg, distantia con taxi al centro: 7 minutas), per auto (A5 Karlsruhe-Basel o B31) o per avion (le euroaeroporto Basel-Mulhouse-Freiburg del qual va le autobus-pendula, distantia: 55 minutas).

Nove punctos in le programma

Un scheda de inscription pro le 20me conferentia es preste (actualisation 2013-06-01: Le inscription ha finite). Le preparationes pro un programma interessante e variate comencia ora, coordinate per le Consilio Executive del UMI [0]. Le intention es establir un programma que, in plus alte grado que anteriormente, contine ultra tote le ingredientes "traditional" de un conferentia de interlingua - cursos de interlingua pro comenciantes e avantiates, intertenimento, excursiones in le region, sessiones de labor practic, discursos etc. - plus de presentationes de themas general de valor pro usatores de interlingua. Le intention es invitar personas notabile a presentar se e lor organisationes. Le conferentia es un importante incontro de activistas e representantes de interlingua ab tote le mundo, qui excambia ideas e discute como facer le information public plus efficace pro assi facer plus de personas apprender e usar interlingua activemente.

Le 20me conferentia international de interlingua es organisate in collaboration con le Union German pro Interlingua.

Le centro conferential essera Caritas Tagungszentrum. Illo es situate vicin a Schlossberg, le monte del castello, e es circumferite per un parco elegante, poc minutas a pede ab le citate ancian plen de atmosphera. Le centro ha tote facilitates moderne pro un conferentia - inclusive 15 salas - combinate con un atmosphera historic e con accesso libere a Internet sin filo. Illo contine anque un ample bibliotheca que es a disposition pro le visitatores. Il ha cameras pro handicapates e cameras pro personas allergic. Le cocina servi repastos de alte qualitate usante ingredientes local e con un oculo al sanitate.

Le secunde vice in Germania

Il es le secunde vice que un conferentia international de interlingua es arrangiate in Germania. Le prime esseva le 18ve conferentia [0] in Kirchheimbolanden, vicin a Frankfurt am Main, in 2009, durante le qual esseva fundate le Union German pro Interlingua [0]. Le conferentias international de interlingua ha in general habite loco omne duo annos in annos impar desde 1983. Le prime conferentia de interlingua ja habeva loco in 1955.

Durante le annos recente le conferentias de interlingua [0] ha essite arrangiate in Francia (1997), Romania (1999), Polonia (2001), Bulgaria (2003 e 2011), Svedia (2005) e Germania (2009). Illos es supplementate per incontros o conferentias regional como p.ex. le incontros nordic de interlingua que desde 1988 ha habite loco omne duo annos in annos par, arrangiate per le quatro organisationes nordic de interlingua in Danmark, Norvegia, Svedia e Finlandia.

Le UMI esseva establite in julio 1955, quatro annos post le apparition de interlingua. Le UMI ha hodie membros e representantes in cinque continentes e es juridicamente registrate [0] presso le autoritates francese.



Le Union Mundial pro Interlingua (UMI), establite le 28 de julio 1955 pro diffunder le international lingua auxiliar interlingua, es un institution pro cooperation international con membros e representantes in cinque continentes. Le UMI esseva registrate juridicamente como association numero 0911004931 per le autoritates francese le 3 de augusto 2006. Le Consilio Executive es responsabile pro le functiones quotidian del UMI. Le Consilio General fixa le strategia e labor al longe lineas. Le UMI publica desde januario 1988 le international magazin de novas Panorama in interlingua [0] (ISSN 0903-2932) omne duo menses. Interlingua esseva publicate in 1951 per le International Auxiliary Language Association (IALA).


Adresse de fonte:
http://www.interlingua.com/official/2012-08-28-conferentia2013