logo
Publicate per le Union Mundial pro Interlingua (http://www.interlingua.com)

Representante pro Hungaria ha morite

Per Thomas
Create 2011-05-07 13:31

Ferenc Jeszenszky qui ha representate interlingua in Hungaria durante 30 annos ha morite.

UMIFerenc Jeszenszky  Le representante de interlingua in Hungaria desde 1981 e ex-secretario general del Union Mundial pro Interlingua, Ferenc Jeszenszky, ha morite le 21 de april in le etate de 78 annos.

Ferenc Jeszenszky habeva un enorme interesse linguistic lo que le faceva interessar se pro interlingua in 1980. Ille sovente se misceva in debattos linguistic e esseva consultate per collegas pro haber consilios lingual. Ille ha scribite numerose articulos super themas lingual in le magazines de interlingua, e in 1987 appareva su version hungare del famose manual "Interlingua - instrumento moderne de communication international" per Ingvar Stenström.

Desde 1981 ille ha representate interlingua in Hungaria e deveniva membro del Consilio General del Union Mundial pro Interlingua in 1982. In 1987 ille functionava como redactor interimari del magazin del UMI, Currero, durante un anno.

In 1989-1991 ille esseva secretario general del UMI.

Ille nasceva in Budapest in 1932, e post haber finite le schola secundari ille studiava physica al Universitate de Budapest e deveniva doctor in 1961. Ab 1971 a su retiramento in 1996 ille esseva empleate al Secretariato del Academia Hungare del Scientia.

Ferenc Jeszenszky habeva ante 12 annos un operation cardiac de "bypass" quadruple e viveva un vita active usque le fin. Ille moriva subito de un clausura quasi total del arterias coronari del corde.

Ferenc Jeszenszky perdeva su sposa, Erzsébet, ante plure annos. Illes ambes assisteva in plure conferentias international de interlingua con bon humor e grande ingagiamento. Illes non habeva infantes.

Ferenc Jeszenszky essera interrate in le cemeterio de Törökbálint le 11 de maio.

Que vive su memoria.


Adresse de fonte:
http://www.interlingua.com/official/2011-05-07-jeszenszky