Skip navigation.
Home

Comparation de adjectivos

§34

Grados de COMPARATION es exprimite per le adverbios plus e minus.

adjectivo comparativo superlativo
bon plus bon le plus bon
bon minus bon le minus bon
interessante plus interessante le plus interessante
interessante minus interessante le minus interessante

In casos quando le comparativo es precedite per le articulo definite, illo coincide con le superlativo. Le exemplos infra (§35) monstra que isto involve nulle confusion.

§35

Comparation de equalitate es exprimite per tanto ... como, o si ... como. Le particula post le comparativo es que.

Le formas de comparativo e superlativo que seque le substantivo repete le articulo definite precedente – in caso que il ha un tal.

Un homine es tanto bon como un altere e frequentemente etiam un grande portion plus bon.
Iste historia es le minus interessante que io ha legite.
Iste historia es le minus interessante del duo.
Del duo summas paga le plus parve.
Chesterlucks es plus blande.
Le presidente del committee ajorna omne le questiones le plus urgente.
Illa ha le plus dulce temperamento e le ideas le plus naive.

§36

Le idea del si-nominate SUPERLATIVO ABSOLUTE pote esser exprimite como in anglese per constructiones varie:

le plus interessante,
multo interessante,
extrememente interessante,
terribilemente interessante,

etc.

Un medio usate specificamente pro le intentos del superlativo absolute es le suffixo -issime.

Su replica esseva un "non" multo emphatic.
Su replica esseva un emphatichissime "non."
Ille parla in un maniera terribilemente interessante.

§37

Le particulas plus e minus, que es usate pro exprimer grados de comparation, mesme es exemplos de adverbios que admitte nulle formas regular de comparation (vide §44 infra), sed a vices in se pote exprimer un "grado comparative." Similarmente, il ha in le vocabulario de Interlingua alicun adjectivos que on pote reguardar como synonymos irregular de certe formas comparative e superlative.

adjectivo comparativo superlativo
parve plus parve le plus parve
minor le minor
minime
magne plus magne le plus magne
major le major
maxime
bon plus bon le plus bon
melior le melior
optime
mal plus mal le plus mal
pejor le pejor
pessime
Initio del pagina