Skip navigation.
Home

Radio Interlingua 023

Emission de 2010, junio. Contento: | Interview con Ingvar Stenström in 2008, Linköping, Svedia - secunde parte | Musicas de solo un minuta |

Le libro mentionate in le emission

Car ascoltatores,

Le libretto de Ingvar Stenström, mentionate in le emission ha le titulo: Occidental-Interlingue: Factos e fato de un lingua international e pote esser ordinate sub le ligamine supra (o cliccante ci al siniste al puncto de menu "Libros e litteratura", postea al puncto de menu "Servicio de Libros UMI" e seliger le lista del autores secundo le ordine alphabetic, ubi se trova le littera S, pro "Stenström").

Le editor es le Societate Svedese pro Interlingua, 1997. Le libretto ha 40 paginas A5; le numero ISBN es: 91-971940-2-6.

Le description scribe:

"Occidental, autorate per le estoniano Edgar de Wahl, esseva un precursor de interlingua. Ingvar Stenström, mag. fil. in Svedia, ha examinate le historia interessante del lingua e colligite pro le prime vice le factos de su developpamento e diffusion. Ab isto, ille presenta le conclusiones que pote interlingua apprender del fato de Occidental, e como pote interlingua usar iste experientias pro assecurar su diffusion continue."

Le obra es ordinabile anque directemente a Piet Cleij, Kometenlaan 38, 3721 JT Bilthoven, Nederland e costa 6 €.

Péter Kovács

Le contento describite plus detaliatemente

Car ascoltatores!

Ecce, arrivava le prime emission estive de Radio Interlingua pro junio 2010.

Iste vice io continua presentar le interview interessante con Ingvar Stenström, pionero de interlingua desde le 1950s, ora secretario general del Societate Svedese pro Interlingua. Le registration era facite per me in le 11me Incontro Nordic de Interlingua in Linköping, Svedia, in 2008.

Recitante le historia del movimento de interlingua primarimente in le paises nordic Ingvar mentiona nomines de altere linguas auxiliar o refere a lor adherentes, que io pensa, debeva esser un poco explicate pro le ascoltatores laic.

Ultra interlingua, le lingua auxiliar le plus mentionate in iste interview es interlingue, o previemente appellate: occidental.

Mesmo in iste curte portion de dece minutas del interview nostre "Interlingvar" parla super multe themas: proque ille appoia justo interlingua; qui besonia interlingua. Ille parla super le movimento de interlingua in le 50s e postea; super le rationes de que interlingua es successose in paises nordic. Particularmente son mentionate le incontros scandinave / nordic e le importantia de informar super interlingua in le medios de massa. E finalmente io le poneva le question: proque interlingua non es popular a romanophonos?

Anque iste vice le musicas veni de mi ex-collega musico, Csaba Kocsis, qui habita in le mesme urbe como io; de su album Zenei egypercesek (Musicas de un minuta). Le prime pecia que se audi ha le titulo de Mono-Tone, le secunde: G-dúr master.

Le redactor Péter Kovács vos desira un bon passatempore iste vice con Radio Interlingua!

Initio del pagina