logo
Publicate per le Union Mundial pro Interlingua (http://www.interlingua.com)

Va con le "Interlingua-Express" al conferentia

Per Thomas
Create 2009-04-27 17:12

Servicio de shuttle ha essite organisate del aeroporto in Frankfurt am Main pro le conferentia international de interlingua in julio.

  Le transporto al 18ve Conferentia International de Interlingua in julio ha devenite plus facile.

»Nos ha organisate un servicio de shuttle del aeroporto Frankfurt/Hahn a Kibo e retro, un »Interlingua-Express«. Le costos pro viagar es inter 25 a 60 euros dependente al numero del participantes. Un microbus pro 7 personas costara 175,00 euros de Hahn a Kibo e 175,00 euros a retro. Le numero de personas per cata bus es tres a septe assi le precio depende del numero,« dice Sven Frank, organisator in chef del conferentia e secretario general del Union Mundial pro Interlingua.

Ille spera que omnes, qui ja se ha inscribite, vole motivar lor amicos a venir al conferentia que habera loco le 25 de julio al 1 de augusto 2009 in le urbe medieval Kirchheimbolanden, 80 km de Frankfurt am Main in Germania central.

Le inscriptiones debe esser facite al plus tarde le 1 de maio 2009 - ma preferibilemente antea, si on desira obtener le typo de camera preferite.

Si on intende continuar su vacantias in Germania, on pote contactar le organisatores pro obtener adjuta. Sven Frank vole alora cercar un habitation gratuite in le casa de un interlinguista amical de Germania.

»Alora, inscribe vos pro participar a un conferentia que essera un grande passo in le futuro del lingua que nos omnes desira haber como lingua de communication in Europa e le mundo,« dice le secretario general del UMI.

Visita le pagina principal del 18-ve Conferentia International de Interlingua [0]

Trova le scheda de inscription ci [1]


Adresse de fonte:
http://www.interlingua.com/novas/2009-04-27-conferentia