Daneses (e omnes, qui parla danese) pote ora sequer un curso de interlingua in 15 lectiones per Internet.

Le Union Mundial pro Interlingua ora publica "Interlingua-kursus for begyndere" (Curso de interlingua pro comenciantes). Isto es le version original in danese del curso scribite per Thomas Breinstrup, le secretario del Union Danese pro Interlingua e originalmente publicate como libro in 1984 ma ora exhaurite. Le curso ha devenite un grande successo como curso electronic; actualmente existe versiones in norvegiano, anglese, germano, italiano e espaniol.

Le curso es publicate in formato PDF lection post lection, assi que on pote discargar lo e apprender le circa 750 parolas. Le prime dece lectiones forma un historia complete del familia Hansen, qui va a Scotia pro visitar su amicos. Il ha explicationes grammatic e exercitios pro cata lection. Le ultime cinque lectiones es conversationes plus longe.

Le curso es illustrate per Henrik Breinstrup, le patre del autor.

Tote le materiales del curso es ponite a disposition libere ma remane coperite per le derecto de autor. Isto significa que on naturalmente pote usar lo personalmente, ma que il non es permittite distribuer lo a alteres, ni publicar lo in altere manieras, p.ex. per altere sitos in Internet o sur CDs/DVDs, sin le permission in scripto del possessores del derecto de autor.