logo
Publicate per le Union Mundial pro Interlingua (http://www.interlingua.com)

da Vinci in interlingua

Per Thomas
Create 2007-12-30 17:51

  Le Bibliotheca electronic in interlingua pote ora anque presentar le multigenio le plus grande in le mundo, Leonardo da Vinci, in interlingua.

Le pictor del famose "Mona Lisa" anque esseva un diligente scriptor de fabulas - breve contos. Tal historias es multo bon a leger, quando on vole maestrar melio interlingua, nam illos es breve e concise, e le vocabulario assi non es troppo grande.

Thomas Breinstrup, le redactor del magazin official del Union Mundial pro Interlingua, Panorama in interlingua [0], ha traducite duo fabulas de da Vinci pro le Bibliotheca electronic in interlingua.

Le Bibliotheca electronic in interlingua es un collection de e-libros, redigite e publicate per le Union Mundial pro Interlingua (UMI) in www.interlingua.com. Le collection consiste de textos de qualitate que on pote discargar e leger sur un schermo computatorial - o imprimer sur papiro, secundo su preferentias personal.

Le e-libros in interlingua demonstra le ric varietate de textos original o traducite, belletristic o professional, que existe in le litteratura de interlingua. Le e-libros normalmente es editiones con un limitate numero de paginas; libros plus grande, imprimite sur papiro, pote esser comprate per le Servicio de Libros del UMI.

Ligamines:
Servicio de Libros UMI [0]
Le Bibliotheca electronic in interlingua [0]


Adresse de fonte:
http://www.interlingua.com/novas-2007-12-30-davinci