Skip navigation.
Home

Adjectivos usate como pronomines o substantivos

§38

In theoria, CATA ADJECTIVO POTE SERVIR COMO UN PRONOMINE. Le substantivo que illo representa es sia alicuno exprimite in le passage precedente, sia un notion plus o minus definite in le mente del parlator.

Le puero ha un conilio mascule e duo conilias. Le mascule pare assatis grasse pro esser mangiate.
A causa de su eterne mal humor nos le appella "le acre."

In le prime exemplo, 'le mascule' representa 'le conilio mascule'; in le secunde exemplo, 'le acre' suggere un esser human masculin sed non un substantivo specific como homine, puero, maestro, etc. In le casos del secunde sorta, il pote esser preferibile parlar de "adjectivos usate como substantivos," o "adjectivos substantivate" plus tosto que de "adjectivos usate como pronomines." Le adjectivos usate como substantivos include etiam abstractiones del sorta 'le bon', 'le ver', 'le belle' in le senso de bonitate, veritate, beltate.

§39

Adjectivos usate como pronomines o substantivos se comporta grammaticamente como substantivos ordinari e pote esser pluralisate.

Le puero ha quatro conilios, duo mascules e duo feminines.
A causa de lor eterne mal humor nos les appella "le acres."

§40

Numerose adjectivos listate in le Interlingua-English Dictionary corresponde a entratas substantive parallel.

adjectivo substantivo
bon bono
auguste augusto; Augusto; Augusta
characteristic characteristica
chromatic chromatica
indonesian indonesiano
natural natural
provincial provincial
technic technico; technica
automobile automobile
ambiente ambiente
alte alto
belligerente belligerente
comestibile comestibiles
combustibile combustibile
composite composito

Le possibilitate de assi cambiar adjectivos in substantivos es limitate per nihil altere que senso commun. Si non alteremente crystallisate per le usage, un adjectivo usate como un substantivo de plen status (non simplemente como un pronomine pro un substantivo mentionate previemente) exprime sia le notion abstracte del qualitate representate per le adjectivo – p.ex. le bon, le belle, le sublime – sia un cosa o persona characterisate per lo que le adjectivo exprime – p.ex. le car, le amate, le previe, le ferite. Quando illos exprime un qualitate abstracte e quando illos representa un esser masculin, le adjectivos cambiate a substantivos o assume le desinentia vocal -o, o remane inalterate. Quando illos representa esseres feminin, illos assume le desinentia -a, o remane inalterate.

Le cambio al desinentias vocal -o e -a sub le conditiones exprimite es le norma. Le adjectivos que non seque ille norma es listate in §41 infra. Il debe esser notate, totevia,

(a) que le lista es exhaustive e assi include un bon numero de adjectivos pro le quales le distinction de masculin e feminin ha nulle significantia practic, e

(b) que le lista es un "lista del purista" assi que le uso erronee del desinentias -o e -a con su objectos non pote esser considerate un cosa seriose.

§41

Adjectivos que non pote, quando usate como substantivos, assumer formas distincte in -o e -a ben que illos es capace de, si le senso lo permitte, assumer le desinentia plural include le sequentes:

(a) omne adjectivos que fini in -ce e -u; p.ex.

rapace, precoce, dulce, ...
hindu, manchu, blau, ...

etc.;

(b) omne adjectivos cuje thema apparente es sequite per -ese/-ense, -il/-ile, -ior, -nte, si o non iste desinentias es clarmente recognoscite como suffixos; p.ex.

francese, ...
futile, ...
junior, ...
consciente, clemente, ...

etc.;

(c) omne adjectivos que fini in le suffixos -al, -ar, -bile, -oide, -plice; p.ex.

natural, ...
linear, ...
amabile, ...
negroide, ...
duplice, ...

etc.;

(d) le adjectivos:

celibe,
grande, prode, verde,
folle, molle,
juvene, omne, solemne,
alacre, celebre, celere, mediocre, memore, plure, pubere, ubere, vetere,
necesse,
agreste, forte, quite, triste,
tenue,
breve, grave, leve, suave,
cruel, fidel, qual, tal,
minor, par

(e) omne adjectivos derivate de illos listate supra per prefixos; p.ex.

supernatural, infidel, ...
etc.;

(f) le adjectivos del nomines geographic e racial:

caribe,
ethiope,
ligure, macedone, saxone,
mongol,
moslem,
turcoman;

(g) adjectivos grammatic indeclinabile como cata, que, e combinationes con -cunque;

(h) certe adjectivos derivate per un elemento prefixate sed sin un suffixo (vide §164) del substantivos sequente:

substantivo adjectivo
anno p.ex. bienne, trienne
caput p.ex. bicipite, precipite
color p.ex. incolor, tricolor
corde p.ex. concorde, discorde
corno p.ex. bicorne, unicorne
cuspide p.ex. bicuspide, multicuspide
fin p.ex. affin, confin
flor p.ex. multiflor, uniflor
forma p.ex. multiforme, uniforme
lingua p.ex. bilingue, crassilingue
remo p.ex. bireme, trireme

(i) le adjectivos sequente que representa le mesme typo como illos listate sub (h) sed le quales es formationes isolate o non pote esser facilemente recognoscite in lor composition:

enorme, exsangue, illustre, imbecille,
indemne, inerte, infame, inope, insigne,
insomne, semi-somne,
isoscele, macroscele,
multicaule, myope, participe,
commun, immun, impun.

§42

Concernente le formation de adjectivos e etiam del derivatos de illos, vide §§139, 140, 141, 142, 45-47, 152-153.
Initio del pagina