logo
Publicate per le Union Mundial pro Interlingua (http://www.interlingua.com)

Participa in le grande evento de interlingua in julio

Per Thomas
Create 2006-03-17 23:34

Le schola popular Vadstena Folkhögskola es situate justo al ripa del laco Vättern e vicin al ecclesia del claustro.

  Le grande evento de interlingua del estate essera le 10-me incontro nordic de interlingua in le belle citate medieval Vadstena, justo al ripa del laco Vättern in le centro de Svedia.

Vicin al laco es situate le schola popular, Vadstena Folkhögskola, que essera le centro de interessatos e usatores de interlingua de Svedia, Danmark, Norvegia e Finlandia e - certo - un serie de visitatores international.

Mercuridi le 26 de julio comencia un curso intensive de interlingua pro comenciantes e un simile curso de conversation pro plus avantiates. Usque a venerdi postmeridie le 28 de julio le duo professores professional de interlingua, Ingvar Stenström e Bengt Enqvist, in maniera inspirante va assecurar que omnes vermente sape parlar e usar interlingua. In le pausas e post le curso il ha assatis de tempore pro conversationes, pro ambular in le natura, pro mangiar e pro reposar durante le vesperes.

Venerdi postmeridie ancora un multitude de participantes va arrivar a Vadstena Folkhögskola. Alora comencia le 10-me incontro nordic de interlingua, ubi on vermente pote usar interlingua in practica. Le quatro organisationes nordic de interlingua - le Union Norvegian pro Interlingua, le Union Danese pro Interlingua, le Association Finlandese pro Interlingua e le hospite, le Societate Svedese pro Interlingua - invita pro le 10-me vice a un amusante e laboriose fin de septimana, ubi on debe elaborar strategia e planos pro dar a interlingua un expansion plus grande in le paises nordic.

Le incontro, que dura usque lunch dominica le 30 de julio, va sperabilemente resultar in multe bon ideas e crear bon discussiones de como effectivisar le labor pro diffunder interlingua. Un programma plus detaliate es actualmente sub preparation.

Durante sabbato il habera un excursion al citate de Vadstena pro vider i.a. le claustro del sancte Birgitta. Le vesperes es traditionalmente usate pro un poco de cantar e musicar, conversationes amical e forsan un poco de intertenimento.

Inscription ante maio
Pro participar in le curso intensive de interlingua e/o le incontro nordic de interlingua es necessari inscriber se si tosto como possibile (si on vole esser secur de obtener le typo de camera desirate). Le absolutemente ultime data de inscriber se e haber pagate pro su participation es le 25 de maio.
Discarga le scheda de inscription [1] (le Societate Svedese pro Interlingua)
Vadstena Folkhögskola [2] (con belle photos panoramic)
Le officio touristic de Vadstena [3] (in svedese e anglese)

AnnexoGrandor
Information re le 10-me incontro nordic de interlingua.pdf [4]7.78 KB
Scheda de inscription international.pdf [5]5.24 KB

Adresse de fonte:
http://www.interlingua.com/incontronordic