logo
Publicate per le Union Mundial pro Interlingua (http://www.interlingua.com)

17-me Conferentia International del Union Mundial pro Interlingua

Per Thomas
Create 2006-01-24 13:39

le 16 ~ 22 de julio 2005  |  Benvenite a Svedia!


Löftadalens Folkhögskola –
de restaurante a centro conferential

Le incontros nordic ha tres vices essite arrangiate in le centro conferential.

SVEDIA – "Illo appare como un reactor nuclear." Assi esseva le reaction immediate al prime photo de Löftadalens Folkhögskola (le universitate popular de Löftadalen) prendite del mar, quando le schola debeva esser presentate ante le 7-me incontro nordic in 2000.
     Ma mesmo si Löftadalens Folkhögskola non es distante del ver reactor nuclear in Ringhals, su architectura non esseva intendite como un nucleo de energia. Åsa Badrestaurant (Le restaurante de banio in Åsa) aperiva in 1934 in locales designate in le stilo "funkis". Del fenestras in le grande sala le visitatores poteva spectar le mar scintillante que batteva verso le roccas.
     In 1944, partialmente a causa del guerra, le restaurante debeva clauder, ma le locales reaperiva le 29 de decembre 1944 como albergo pro infantes. In 1964 le parlamento local de Halland lo comprava pro un million de coronas post haber locate lo desde 1960 pro scopos educational. 
     Löftadalens Folkhögskola es hodie un schola apolitic con 150 alumnos e 75 cameras. Il ha 50 empleatos, del quales le 16 es professores. Un totalmente nove sala moderne de mangiar esseva aperite in 2004 - anque illo con un vista impressionante al mar e al parve village vicin.
     Le quatro organisationes nordic de interlingua in Norvegia, Danmark, Svedia e Finlandia ha tres vices arrangiate lor incontros nordic de interlingua in Löftadalens Folkhögskola – in 2000, 2002 e 2004. Le incontros nordic comenciava in Lund in 1988 con solmente participation svedese e danese e deveniva nordic in 1998.

 
Le plano del edificios de Löftadalens Folkhögskola. Preter le via al edificio principal il ha casas, ubi viveva antea le professores del schola; hodie le cursistas los usa.



Löftadalens Folkhögskola es un moderne centro conferential con omne facilitates, situate solmente 75 metros del mar - con roccas e un agradabile plagia de sablo.
    


Assi on trova su via a Åsa e al septimana de interlingua iste estate. (Mappa: Löftadalens Folkhögskola)


Adresse de fonte:
http://www.interlingua.com/conferentia/2005/loftadalen