logo
Publicate per le Union Mundial pro Interlingua (http://www.interlingua.com)

17-me Conferentia International del Union Mundial pro Interlingua

Per Thomas
Create 2006-01-24 12:48

le 16 ~ 22 de julio 2005  |  Benvenite a Svedia!


Photo: Piet Cleij

Sia benvenite a Naturum – Getterön

Getterön (litteralmente “le insula de capras”) es un del localitates le plus “proxime” de aves. Tu veni vicin al aves, sin disturbar los, gratias a refugios e locos pro observation. 
     Ab Naturum de Getterön tote le reserva es vidite per fenestras panoramic, e ci il anque ha information re observationes actual de aves. 
     Prende un caffe e organisa tu sojorno. Tu ha permission a visitar omne establimentos excepte le Casa de VOF (Le association ornithologic de Varberg), lo que exige reservation particular. Es gratuite entrar. 
      In omne altere partes del reserva, con exception del establimentos e sentieros, il es prohibite entrar durante le anno integre.

Ornithologia tote le anno 
Getterön da possibilitates excellente pro ornithologia durante omne menses del anno. In le primavera e le autumno grande massas de anseres, anates e charadriformes (aves litoral con longe gambas) reposa. Gratias al climate benigne e le vicinitate al mar multe aves remane durante le hiberno. Aqua calefacite, del installation de purification de aqua residual de Varberg, flue per le canal al laguna e contribue a impedir glacie mesmo durante hibernos dur. Immediatemente infra Naturum on pote vider a causa de isto e podicepses cristate, mergos abelle, martin-piscatores e multe altere visitantes excitante del hiberno. Sur le aqua anque es vidite greges de cygnos e nyrocas. In le cannas se assembla paros barbate insimul con rallos aquatic e botauros stellate. Le falcon peregrin sojorna in le reserva tote le anno e pote durante le hiberno haber compania de e le aquila marin e le gerfalcon. 
    Getterön, un del localitates ornithologic le plus exquisite de Europa del Nord, es situate 2 km al nord del centro de Varberg, in le provincia Halland, al costa west de Svedia. Le terrenos paludose es un eldorado pro aves e ornithologos. Circa 170 species cova o face halto durante le migration. Extra istos, un grande numero de visitantes temporari arriva. Non minus que 327 species esseva observate presso Getterön usque a 2001, e le lista continuemente deveni plus longe. Quasi semper il ha alcun ave rar, visitante de longe distantia, que demora in Getterön o su vicinitates.

In le reserva il ha plure differente typos natural, cata uno con su valor special pro le activitate de aves in Getterön. Ab le cabana de observation e Naturum on ha bon supervista super le ambientes differente.

Le stagno 
Le nivello del aqua e le salinitate es regulate per medio de dica e pumpas, de maniera que le ambiente essera favorabile pro le aves. In le aqua basse, parve animales differente se trova ben. Illos devenira nutrimento pro anates e charadriformes. Durante le fin del estate e le autumno le nivello de aqua es bassate, lo que discoperi bancas de limo ubi charadriformes reposante pote trovar nutrimento. 
     Ultra omne le anates, le sterna hirundine, le laro ridibunde e le avosetta es particularmente predominante inter le aves del stagno. 
     Illos cova in grande colonias sur le insulas artificial, insimul con le parve sterna, le piscator de ostreas, le pluviero anellate e le parve pluviero anellate. In le amassamento de cannas, le fulicas, le podicepses cristate e le anseres cineree cova.

Le cannas 
Multe parve aves reposante e pernoctante periodicamente cerca protection e nutrimento inter le cannas, ma solmente un minoritate passa tote le anno ibi. A istos pertine le emberiza del junco e le paro barbate. In le estate illos se regala del abundantia de grillos, mosquitos, muscas, hymenopteros e altere insectos, ma in le hiberno illos cambia dieta a granas de cannas. Iste duo species tu plus facilemente discoperi foras del refugio del cannas e foras del grande refugio, ubi illos sovente scande inter le cannas. Durante le prime parte del estate es audite in le cannas le strophes monotone del parve acrocephalo e forsan anque le canto plus variate del acrocephalo del junco. In augusto il anque ha bon chances pro haber un breve vista de un rallo aquatic o porzana que curre inter le clarieras del cannas.

Le pratos litoral 
Extendite, periodicamente inundate pratos litoral se expande sur grande partes del reserva. Bestias pasturante face le solo herbose nude e impedi le vegetation de coperir lo. Si le pastura fini, le pratos essera coperite per cannas e multe species de aves dispare. 
     Le species specific del pratos litoral es primarimente charadriformes covante. Plus commun es le vanello e tringa totan ma anque le limosa e le calidris alpin se trova ci. Le philomacho esseva plus commun olim ma nunc se trova solmente per un singule par cata anno. 
     Le ansere cineree, al contrario, es un specie que se ha augmentate, e le grande greges de anseres da character al pratos litoral de Getterön. Le pastura del anseres anque contribue a tener le pratos litoral discoperte. 
     Le vegetation consiste primarimente de gramineas e carices, ma ci anque herbas como astere sibiric, plantago maritime e trifolio fragifere vegeta. In le zona transitori inter terra e aqua sta amassamentos de juncos que da protection e nutrimento pro multe anates. Le granas nutritive del scirpo lacustre e le scirpo maritime es alimento basic del anates.

Le laguna 
Pois que le laguna poco profunde es providite de aqua ab le canal e le rivo nutritive de Himle (in svedese: Himleån), le aqua es dulce. Plus distante verso le Baia de Farehammar le aqua deveni plus salate. Grande greges de anatinis (simänder) se assembla in le laguna durante le migration primaveral e autumnal. Le majoritate de illos migra plus longemente dum alcunos remane e cova. Tote species del anatinis svedese ha covate presso Getterön durante le ultime annos.

Le bancas de limo 
Omne species charadriformes svedese reposa regularmente presso Getterön. Grande greges es vidite circumvolar inter le bancas de limo e al longe del litores poco profunde. Con lor longe gambas e beccos, le charadriformes es specialmente adaptate pro sasir le parve animales que vive in iste ambiente.

Animales parve in le aqua 
In le aqua poco profunde e nutriente le production de plancton es multo alte. Plancton postea essera nutrimento pro un multitude de parve animales, le quales a lor torno essera nutrimento basic pro le aves. Al dextere es vidite alcunos de omne iste animales parve que vive in le aqua. 
     Larvas de mosquitos plumate vive in aqua dulce, e polychetos vive in aqua salate. Ambes es nutrimento agradabile pro charadriformes. In recompensa le mosquitos adulte es nutrimento pro le juvene charadriformes del prato litoral. Le coridixos vive in le aqua salmastre del stagno. Iste insecto aquatic da proteina importante a gallinas anatin, quando illos debe poner ovos.

Traduction per Erik Enfors del brochure official 
Publicate in interlingua con permission de Getteröns Naturcentrum
.

In iste pagina: Getteröns fuglereservat ("Naturum", le reserva de aves a Getterön), un del locationes le plus importante in Svedia pro aves de areas del mar. Illo es situate al costa west in le region Halland, e il ha ci plus que 300 species, inter illos multe species rar. Le reservato es listate in le "Convention on Wetlands" del areas plus digne a conservar.