logo
Publicate per le Union Mundial pro Interlingua (http://www.interlingua.com)

17-me Conferentia International del Union Mundial pro Interlingua

Per Thomas
Create 2006-01-24 12:45

le 16 ~ 22 de julio 2005  |  Benvenite a Svedia!


Sia benvenite a un circuito pedestre
in le fortalessa de Varberg

Texto: Museo Provincial de Varberg, 2001 
(Fontes i.a. le Libro annual del Museo de Varberg, 1995) 
Traduction in interlingua per Erik Enfors, 2005. Publicate con permission

1. Le via de montata previemente esseva un parte de un construction de defensa externe, un si-nominate tenalia. Ante le porta il habeva un ponte de ligno con un ponte levatori. Le fossato alora se extendeva plus longe al west.

2. Le valvula inferior o le Porta inferior del fortalessa con un valvula de briccas del annos 1610 es construite in angulo pro impedir le foco de inimicos attinger le partes interior del fortalessa.

3. Le bastion del Monacho Blanc es edificate 1588-1618 e aggrandite 1638-1641. Le prime porta a sinistra in le passage duce a un camera de guarda. Le sequente porta duce a passages subterranee, casamatas (cameras subteranee pro cannones) e salas pro provisiones in tres etages. Durante le ultime parte del 18e e le prime parte del 19e seculo, prisionieros condemnate pro tote le vita esseva internate in le cameras obscur del Monacho Blanc. Un camera, in le mesme nivello como le fossato, esseva reservoir de aqua. Le vallos sur le cresta del bastion es mittite al altitude que illos habeva durante guerras.

4. Le ferreria del fortalessa in le parte al west del bastion le Monacho Blanc ha essite nominate le “Prision del general Pechlin”, secundo general C.F. Pechlin qui esseva accusate pro le conspiration al assassination del rege Gustav III, qui esseva prisioniero in le fortalessa 1792-1796. Ma demonstrabilemente ille sojornava in le “Casa del Commandante” (no. 32), un prision multo plus confortabile.

5. Le scala de Karl XII. Secundo le tradition popular, le rege es dicite haber cavalcate in alto sur illo.

6. Stabulo del annos 1610, postea arsenal (i.e. deposito de armas), appellate le stabulo de Karl XI. Supra le porta il ha le codice del nomine del rege e le anno del reparation 1692, lo que ha substituite le plus vetule C4 (Christian IV) del tempore danese del fortalessa. Hodie le Museo de Bicyclettas (Cykelmuseet), le Archivo del Movimentos Popular (Folkrörelsernas arkiv) e le Archivo de Emanuel Hvalgren es allogiate ibi – tote le quales pertine al Museo Provincial Varberg (Länsmuseet Varberg).

7. "Le Fonte de Rege Karl". Un porta in le muro al longe del strata duce al fonte que es dece metros profunde.

8. Le vetule paneteria statal, edificate in le annos 1800 pro fornir pan a omnes in le fortalessa. Circa anno 1900, domo de subofficieros durante sojorno al station thermal. Hodie albergo de juventute con reception, cameras, locales de conferentia e le café “Kafé Kadetten”.

9. Originalmente le loco de labor del artilleria, edificate circa 1750, postea edificio de commando. Hodie domos private.

10. Caserna de artilleria, edificate 1742. Hodie domos private.

11. Caserna de infanteria, edificate in le annos 1750. Edificio de justitia durante le annos 1800, con prision in le parte al west. Hodie albergo de juventute.

12. Le domo del director del prision, edificate 1852. Hodie officio del Autoritate Statal de Proprietates (Statens Fastighetsverk).

13. Prision con cellas, prision statal, edificate 1856. Le ultime prisionieros quitava le prision in junio 1931. Hodie albergo de juventute con 23 cellas confortabilemente equipate, sala commun e locales pro servicio.

14. Le bastion del ferreria edificate 1588-1618. Durante le epocha de prision il habeva hic un corte de exercitio pro le prisionieros.

15. Le Valvula Medie, un edificio con porta e barras abassabile in ambe directiones, formava un catena del secunde linea de defensa. Al nord se vide le cifra del anno 1612 e un placa de petra arenacee. Observa le portas original, fornite de guarnitura de ferro, al interior del valvula. In un etage superior, le Museo de Varberg habeva su prime locales de exposition 1917-1925. In le etage basse il ha hodie toilettas pro touristas.

16. Muro de fortification que con le Valvula Medie (no. 15) e le Cavallero Alte (no. 19) esseva un linea de defensa interne del fortalessa. Le porta in le muro esseva facite 1924 a petition de officieros qui desirava un entrata private ab le edificios del commando al castello. Sur le muro pende un campana de ecclesia que olim pendeva sur le Ala Nord del Castello (no. 29), ubi le eccelsia del castello esseva allogiate. Illo esseva abducite 1830 a Karlsborg ma esseva retornate 1969. Sur illo se lege: “Al castello de Varberg io debe pertiner. Que Deo puni ille qui me prende de ibi, 1754.”

17. Le Fossa de Leones con residuos de un muro vetule que ligava le angulo al sud-est del Valvula Medie con le Casa de Arsenal (no. 18, le deposito de armas). Iste area inter muros alte albergava durante le 18e seculo animales salvage in quarantena, importate per companias de circo. Hic se trovava olim un molino movite per cavallos pro fabrication de pulvere de osso.

18. Le colle de bandiera con residuos del muro de un vetule turre a explosivos que explodeva durante le Guerra Nordic de Septe Annos 1563-1570. Postea esseva edificate un Casa de Arsenal (deposito de armas) pro armas portabile. Illo esseva demolite 1837, marcas con petras demonstra le extension del edificio.

19. Le Cavallero Alte, un altiplana, 20-30 metros large, con parapettos e armamento.

20. Un muro que liga le duo bastiones le Monacho Blanc (no. 3) e le Monacho Gris (no. 22). Observa le flexion del muro pro impedir que on per error tirava su proprie soldatos durante tiradas ab le cameras de cannones del bastiones. Un parte del muro cadeva in le fossato 1974 ma essseva tosto reconstruite.

21. Fossato con influxo de aqua ab le area roccose al sud-est del fortalessa. Al longe del lateres al est e al sud il ha un muro – un linea de defensa anterior.

22. Le bastion del Monacho Gris, designate 1590-1594, edificate 1594-1618 e aggrandite 1640-1643. Casamatas (cameras subterranee pro cannones) con portas de cannones al nord e al west, inter illos passages de connexion. Le casamatas ha constructiones de edification ingeniose pro eliminar le pression del aere e gases de pulvere durante tiradas. In le parietes, il ha niches pro deposito de pulvere e ammunition. Casamatas esseva passate de moda jam durante le 17e seculo e esseva abandonate in favor de armas plus facilemente movibile detra parapettos in alto sur le bastiones. Durante le ultime parte del 17e seculo, le passage inter le casamatas esseva claudite como prision subterranee.

23. Le passage helicoidal Kockenburg, un passage de transportos verticalmente pro cannones in le Monacho Gris, edificate circum un cavia a lumine (le lanterna) con aperturas de lumine verso le passage. Iste passage helicoidal sin grados de scala es 12 metros alte e 2,6 metros large. Le sol successor que Kockenburg ha in le paises nordic es le Turre Ronde in Copenhagen.

24. Le secunde linea de defensa, edificate 1641-1644, con un vallo superior e armamento de cannones. Le pariete al sud esseva le plus exponite de tiradas pois que le inimico poteva placiar su cannones sur le Rocca de Rantzau. (Illo porta le nomine de un general danese, Daniel Rantzau, 1529-1569, qui esseva occidite per un balla de cannon ab le fortalessa durante le assedio in 1569.)

25. Le bastion del Monacho Rubie, edificate 1588-1618. Casamatas (cameras subterranee pro cannones) in tres etages pro tiradas al est que dominava le muros del Monacho Gris. Jam durante le expansion del Monacho Gris in le annos 1640, le casamatas del Monacho Rubie esseva inusabile e replenate. Durante le annos 1920 le casamatas esseva reexcavate.

26. Le posto de observation de pilotas del porto de Varberg con un edificio del 19e seculo.

27. Le terrassa del fortalessa es durante le estate un servicio al aere libere con vista del mar. Olim isto esseva le loco de un cannoneria litoral. Le ducto murate, que entra sub le ala al west del castello, es un ducto vetule de evacuation de aqua ab le corte del castello.

28. Le bastion del cisterna, edificate 1588-1618 con un cisterna pro collection de aqua pluvial del corte del castello. Le aqua esseva intendite pro cavallos e altere animales in le fortalessa e pro lavage. Reconstruite 1995 al stato presente.

29. Le ala al nord del castello, le casa de conte Jacob, esseva le centro in le castello medieval que esseva preste in le annos 1290. Isto es le plus vetule casa preservate in le fortalessa hodierne. Hic resideva i.a. rege Magnus Eriksson durante le 14e seculo. Desde iste tempore a 1830 le edificio esseva usate como ecclesia de garnison. Hodie illo es salas de exposition pro le Museo Provincial Varberg.

30. Le Ala al west del castello albergava desde le medievo al 19e seculo i.a. cocina e paneteria. In le initio del 17e seculo le rege Christian IV reconstrueva le ala a un residentia regal. Le edificio esseva damnate seriosemente per un incendio in 1872, post le qual nove fenestras esseva inserite, e le edificio esseva usate como caserna. Hodie il ha hic locales de exposition pro le Museo Provincial Varberg e pro le Restaurant Borggården (Restaurante Corte de Castello, aperte durante le saison estive.)

31. Le Ala al sud del castello, hodie appellate le Sala Statal (Rikssalen). Al latere dextere del passage il ha un carcere subterranee sin lumine de jorno. Al altere latere del passage il ha un camera con valvulas appellate le Cellario de Eskil (Eskils källare), que ha allogiate stabula e provision de pulvere. Le edificio albergava durante le 19e seculo dormitorios pro un centena de prisionieros e ecclesia de prision. Le Sala Statal primarimente habeva un etage ma esseva reconstruite a duo etages durante le 19e seculo. In 1962 le systema de trabes intermediari esseva removite assi que le Sala Statal nunc ha septe metros de altor. Le Sala Statal es hodie durante le estate un sala de exposition del Museo Provincial e pote esser locate del museo durante le resto del anno. Le Cellario de Eskil pote esser locate durante tote le anno.

32. Le parte al sud del ala al est del castello esseva sin casas inter 1569 e 1850, quando un prision con cellas esseva edificate ibi. Un fenestra de cella ancora es vidite verso le corte del castello. Le parte intermedie del ala al est es appellate le Casa del Commandante (Kommendanthuset). Sur un fundamento medieval esseva hic durante le 17e seculo un casa de muro travate. Le edificio hodierne esseva edificate durante le 18e seculo e contineva le domo del commandante del prision. Le parte al nord del ala al est esseva previemente usate como domo e esseva alora appellate le Casa del Fortification e del Prestre. Le militares finalmente quitava le fortalessa in 1983. Postea le ala al est deveniva locales administrative, archivos e bibliotheca del Museo Provincial.

33. Le puteo es octo metros profunde e ha un affluxo natural via un fissura in le rocca. Le casa del puteo es edificate in 1994 conforme a un designo de 1805.

34. Corte del prisionieros del ultime parte del 19e seculo. Durante le 18e seculo il habeva al latere de illo – sub le parte al sud del ala al est – un jardin de verduras. Hodie le corte de prisionieros es transformate a un horto, plantate in 1995, con inspiration del monasterios medieval. Aperte pro le publico durante le saison estive.


Adresse de fonte:
http://www.interlingua.com/conferentia/2005/fortalessa-circuito