logo
Publicate per le Union Mundial pro Interlingua (http://www.interlingua.com)

17-me Conferentia International del Union Mundial pro Interlingua

Per Thomas
Create 2006-01-24 11:43

le 16 ~ 22 de julio 2005  |  Benvenite a Svedia!



Guidas in vestimentos rural narra del village de Äskhult. Photos: Christina e Thomas Breinstrup

Le vetule vico Äskhult

SVEDIA – Äskhult es situate in le parochia Förlanda, al sud del laco Lygnern in le nord del provincia Halland. Illo consiste de quatro fermas: illos de Götta, Jönsa, Bengt e Derra. 
     Le nomine Äskhult, que pote esser orthographiate con un E o un Ä, es derivate del parolas danese esk (fraxino, in danese: ask) e holt (boscage). Le folios del multe fraxinos que soleva crescer hic esseva un bon forrage pro multe animales e le terra sur le cresta esseva facile a cultivar comparate al solo paludic in basso. 
     Nos non sape quando homines primo se installava hic, ma in le agros on ha trovate objectos de flint del etate paleolithic. In le registros del impostos de Förlanda in le anno 1600 es mentionate que le scabino Anders Joenson colligeva impostos ab quatro fermas del vico. Desde ille tempore le historia del vico es ben documentate. 
     Le vico ha plus o minus le mesme apparentia como in le 18e seculo. Le edificio le plus vetule trahe su origine del 17e seculo. Durante le extensive repartitiones del possessiones de terra in 1825, le terra sur le cresta esseva dividite in quatro partes, ma le agrimensor succedeva fixar le limites in tal maniera que nulle ferma debeva esser displaciate foras del vico. In le fin del 19e seculo, circa 35 personas viveva in le vico, Durante le annos 1890-1914 circa 20 de illes emigrava a America. Le ultime habitante moriva in 1964. 
     Duo del fermas nunc es aperte pro visitatores; Götta e Jönsa.

Le vita in le vico
Como ganiava le villanos pro lor vita? A cata ferma pertineva 2,5-3 hectares de terra cultivate, circa 30 hectares de foreste, terrenos de pastura, terrenos pro fenation e partes del solo paludic in basso del cresta. Le fermeros cultivava hordeo, secale, avena, fabas, rapas e plus tarde patatas, carotas, herbas aromatic e medicinal, lupulo (humulo) e lino. 
     Le grano esseva molite in le molino del vico que esseva situate al fluxo de aqua ab le laco Skärskön presso le vico. Illo esseva demolite circa 1870. 
     In cata ferma il habeva un o duo cavallos, duo o tres vaccas, un juvene vacca o vitello, a vices un juvene bove, alcun porcos, oves, capras e gallinas. 
     In cata ferma il habeva un o duo telarios. Le feminas texeva grande quantitates de texito de drappo, toalias, pannellos de testa, texito pro avantales, camisas e robas. Illas vadeva a pede a Mark e Göteborg e vendeva lor texitos.

Le campania circum le vico
Multe vestigios de fermeros ancian ancora pote esser trovate in le campania circum Äskhult. Il ha p.ex. barrieras de petras, sentieros bestial, cumulos de petras e terrenos de fossiles. Decennios de methodos effective de agricultura e foresteria durante le tempore recente totevia ha causate que le vetule vico de plus in plus ha essite circumferite per un campania de production contemporanee, con vaste campos cohesive, pratos coperite de vegetation e plantationes de pinos. 
     Alcun annos retro le previe territorio del vico esseva protegite como un reserva natural, e un labor extensive nunc ha comenciate pro recrear le paisage del cultura ancian, que existeva hic in le initio del 19e seculo. Illo esseva un paisage con radices in le tempore prehistoric, characterisate per landas non-cultivate utilisate pro pastura, campos de feno ric in flores e parve campos con numerose cumulos de petras. 
     In le campos externe, al nord del vico, vaste areas con plantationes de pino ha essite abattite a fin de dar al landa le possibilitate de extender se de novo. In le valleas humide al nord e al sud del vico le restitution del areas pro recolta de feno que previemente existeva, ma nunc es coperite per vegetation alte, es in progresso. In le areas le plus proxime al vico, le vetule mosaico de multe parve agros, barrieras de petras, cumulos de petras e pratos de pastura essera recreate. Vetule sortas de secale primaveral, avena, hordeo, e lino nunc cresce in le agros de Jönsa e Götta. Durante le saison estive on pote trovar bestias de vetule racias svedese in le campos. 
     Il exigera multe annos recrear un campania como in le initio del 19e seculo circum le vico. De tempore in tempore le campania habera un apparentia disordinate, specialmente post grande abattimentos de foreste. Le scopo es introducer tante formas de cultivation como possibile, p.ex. aratrar con cavallo e fenation con falces. Il pote esser captivante pro visitatores retornante sequer, como le campania circum le vico gradualmente cambiara character verso le scopo final: un campania que reflecte le tempore quando Äskhult ancora esseva un vico vivente ante que le grande transformationes del campania eveniva e le methodos de cultivation del 19e e 20e seculos esseva effectuate. 
     Promenadas guidate facera le historia semblar vivente!

Horas de apertura 
1 de maio – 31 de maio: 11.00 – 17.00 
1 de junio – 31 de augusto: 11.00 – 18.00 
Weekends in septembre 11.00 – 17.00 

Entratas 
Adultes: 30 SEK 
Infantes (6-15 annos): 10 SEK 

Promenadas guidate 
Maio-septembre, dominicas: 13.00 e 15.00 
25 de junio – 14 de augusto: Cata die 13.00 e 15.00. In julio anque 11.00 
Precios: 
Adultes: 20 SEK 
Infantes de minus que 15 annos: gratuite 

Le café 
In le café on pote comprar panettos dulce fabricate a casa. Le caffe es gratuite, quando on monstra le billet de entrata. 
maio – septembre, sabbato – dominica: 12.00- 16.30 
junio – augusto, sabbato – dominica: 12.00- 17.30 
24 de junio - 14 de augusto, cata die 12.00 – 17.30

Information e reservationes pro gruppos 
Maio – augusto: tel. +46 (0)300 54 21 59 
Septembre – april: tel. +46 (0)300 83 47 60 

Informationes ulterior 
Centro Touristic de Kungsbacka 
Tel. +46 (0)300 83 45 95 
Fax +46 (0)300 83 45 99 
e-posta: tourist@kungsbacka.se [1]

Guida pro trafficantes 
E6 del nord: Exito 58 verso Fjärås. Seque indicatores verso Gällinge -Äskhult 
E6 del sud: Exito 57 verso Frillesås. Seque indicatores verso Gällinge-Äskhult


In iste pagina: Texto del brochure official. Traduction in interlingua per Erik Enfors, le Societate Svedese pro Interlingua, www.interlingua.nu [2], 2005. Publicate con permission. 

Adresse de fonte:
http://www.interlingua.com/conferentia/2005/askhult