logo
Publicate per le Union Mundial pro Interlingua (http://www.interlingua.com)

Le nove www.interlingua.com e le nove UMI

Per Thomas
Create 2006-01-15 00:21

UMIUMI  Le nove presentia del Union Mundial pro Interlingua in Internet es presentate hodie post un medie anno de labor.

In julio 2005, le 17-me conferentia international de interlingua approbava un plano visionari de reorganisar tote le UMI e establir un nove organisation plus efficace, plus moderne e con plus de energia e fortias in solmente sex menses.

Le 1 de januario comenciava le nove direction del UMI, in le qual fortias juvene e fortias plus experientiate collabora. Hodie, le 15 de januario (al Die de Interlingua) se presenta le nove sito del UMI in Internet - un del instrumentos le plus importante in promover interlingua activemente in tote le mundo.

Inspiration e information 

Le nove www.interlingua.com debe dar inspiration e information. Illo debe inspirar a multe ideas de nove activitates, e illo debe informar ben super interlingua e su multisisme possibilitates pro communication sin frontieras.

Inter le multe novas, es un section con e-libros - libros electronic que on pote discargar de Internet e leger sur su computator stationari o portabile. Le numero de titulos ancora es minor, ma illo va developpar rapidemente. Un section con material pro studiar interlingua (textos e exercitios) es un altere nova, que multes ha demandate. Le UMI invita omne visitatores e membros a contribuer con lor material que pote esser de valor pro alteres e assi supportar le inseniamento de interlingua in tote le mundo. 

Usa le Navigation (a sinistre) pro trovar lo que tu cerca. Altere possibilitates es le Mappa del sito o le Cerca (in alto), que rapidemente trova tote paginas con le parola(s) scribite. - Un function practic es que on pote ora abonar al paginas principal del multe sectiones. Per cliccar al orange XML on va esser notificate cata vice que nove material appare. Un servicio de novas per e-posta va esser create tosto.

Accesso special a activitates 

Per usar le duo lentes in basso de cata pagina, tote le textos pote esser aggrandite o diminuite. Isto es practic, si on pensa que le grandor del litteras usate como standard non es apte. Le grandor seligite va remaner, usque on abandona www.interlingua.com de novo.

Visitatores pote crear un conto (gratuite) del www.interlingua.com. Actualmente, isto significa que on ha le possibilitate de commentar articulos e libros, ubi isto es indicate. Plus tarde, on va haber accesso a i.a. un foro de discussion e altere activitates que solmente es pro usatores identificate. 

Le transition del ancian sito al nove ha essite un carga enorme que ha demandate centos de horas de labor. Non tote detalios e sectiones ha succedite devenir preste pro le première. Ma durante le veniente septimanas www.interlingua.com va progreder, e le duo grande sectiones que non succedeva apparer in nove vestimentos e con contento revidite - le Servicio de Libros UMI que vende litteratura e libros de interlingua, e le Historia de interlingua que documenta le multissime faciettas de 55 annos con interlingua - va esser perlaborate e presentate in nove versiones melior.

Un foro interactive es sub planification. Audio e video va apparer.  

Invia commentarios, ideas e propositiones 

Le UMI spera que visitatores e membros va adjutar in ameliorar constantemente le nove www.interlingua.com per commentarios constructive, propositiones concrete a cosas que pote devenir melior, e ante toto propositiones a plus de contento interessante. Es impossibile promitter que tote propositiones pote esser realisate, ma le redaction del www.interlingua.com va studiar con grande interesse tote propositiones que arriva. Usa le formulario in Contacto in supra pro inviar ideas, propositiones e commentarios. Es essential pro le developpamento continue del sito, que multes presenta lor commentarios.

Un sito in Internet non es jammais finite e preste. Le developpamento occurre cata die, cata hora. Il ha sempre cosas que pote esser ameliorate. Visitatores va specialmente durante le veniente septimanas vider multe developpamento, dunque visita www.interlingua.com sovente e experientia tote le novas.

Benvenite al nove www.interlingua.com e al nove Union Mundial pro Interlingua!

Alberto Mardegan Thomas Breinstrup
administrator del www.interlingua.com
e tresorero del UMI
co-administrator del www.interlingua.com
e redactor del Panorama in interlingua
 





Adresse de fonte:
http://www.interlingua.com/novesito