logo
Publicate per le Union Mundial pro Interlingua (http://www.interlingua.com)

Panorama celebra 30 annos e veni in colores

Per Thomas
Create 2017-02-18 10:52

Edition numero 175 es le prime con copertura in colores. Panorama ha publicate 4.900 paginas in interlingua.

UMIPanorama in interlingua 30 annos [0]  Le magazin international de novas, Panorama in interlingua [0], entra in su 30esime anno e veni ora in colores.

Panorama ha apparite omne duo menses con 28 paginas desde januario 1988, publicate per le Union Mundial pro Interlingua (UMI) e expedite a abonatos in tote le mundo. Le edition januario-februario 2017 es numero 175, e assi ha essite publicate precisemente 4.900 paginas in interlingua.

Le UMI celebra le anniversario per imprimer le copertura de Panorama in colores ab ora pro facer lo ancora plus attractive a abonatos, membros e nove interessatos. Desde le initio Panorama como magazin international de novas ha presentate articulos e notitias super omne themas possibile in interlingua. Assi le usatores de interlingua pote aggrandir lor vocabulario e maestrar le lingua plus perfectemente.

Un altere mission importante de Panorama es presentar interlingua pro nove interessatos e monstrar su enorme valor e utilitate.

Un abonamento annual [0] del magazin costa 25 euros pro le version imprimite. Le version digital, que es totalmente in colores e es expedite plus rapidemente al abonatos, costa solmente 10 euros. Abonatos del version imprimite anque ha accesso al version digital, si illes include lor adresse de e-posta.


Lege plus in le Historia de interlingua: Un fusion frigide deveniva Panorama [0] | Le schizzo confidential [0]
Lege plus super Panorama, como abonar se e usar le indice del contento: Panorama in interlingua [0]


Adresse de fonte:
http://www.interlingua.com/official/2017-02-18-panorama